نئی دہلی، 22 دسمبر (سیاست ڈاٹ کام ) 6 بار کی عالمی چمپئن ایم سی میری کوم اور ان کی روایتی حریف نکہت زرین کو چین میں ہونے والے اولمپک کوالیفائر کے ٹرائیلز کے لئے 51 کلو گرام کلاس میں شامل کیا گیا ہے جس سے ان کے درمیان مقابلہ کا امکان بن گیا ہے ۔میری کوم نے اس سال عالمی چمپئن شپ سے پہلے یہ کہتے ہوئے ٹرائیلز دینے سے انکار کر دیا تھا کہ منتخب ہونے کے لئے ان کی کارکردگی ہی کافی ہے ۔ میری کوم نے عالمی چمپئن شپ میں کانسی کا تمغہ جیتا تھا۔ میری کوم نے دہلی میں بگ باؤٹ باکسنگ لیگ کے دوران پیٹھ میں درد کا حوالہ دیتے ہوئے خود کو ہٹا لیا تھا جس سے ان کا نکہت کے ساتھ میچ ہی نہیں ہو پایا۔ گزشتہ چند دنوں میں اس بات کو لے کر کافی قیاس چل رہی تھیں کہ کیا ان دونوں باکسر کا ٹرائیلز ہو پائے گا۔ہفتہ کو ہندستانی باکسنگ فیڈریشن کی سلیکشن کمیٹی کی میٹنگ ہوئی جس میں خاتون کے پانچ زمروں اور مردوں کے چھ وزن زمروں کے لئے باکسر کے ناموں کا انتخاب کیا گیا۔ خواتین کے ٹرائیلز 27-28 دسمبر کو دارالحکومت کے اندرا گاندھی اسٹیڈیم میں جبکہ مردوں کے ٹرائیلز 29-30 دسمبر کو کرناٹک کے وجے نگر میں ہوں گے ۔ بی ایف آئی نے حال ہی میں ایک بیان جاری کر واضح کیا تھا کہ اس سال 5ستمبر کو سلیکشن کمیٹی کے اجلاس میں اولمپک کوالیفائنگ کو لے کر جو معیار مقرر کئے گئے تھے وہ اس پر قائم ہے ۔ بي ایف آئی نے اپنے بیان میں بتایا تھا کہ ٹرائیلز کے لیے جو ضروری معیار رکھے گئے ہیں اس میں عالمی چمپئن شپ میں شرکت، قومی چمپئن شپ کے سونے اور چاندی فاتح شامل ہوں گے جبکہ ایک مکے باز کوچز اور سلیکشن کمیٹی کی طرف سے منتخب کیا جائے گا۔نکہت عالمی چمپئن شپ میں حصہ نہیں لے پائی تھیں کیونکہ ان کے وزن کی کلاس میں مریم اتری تھیں۔ 51 کلوگرام وزن کی کلاس کی درجہ بندی میں میری کوم پہلے اور نکہت دوسرے نمبر پر ہیں۔ سلیکشن کمیٹی نے 51 کلوگرام کلاس میں چوتھے باکسر کے طور پر نکہت کو منتخب کیا ہے ۔ اگر میری کوم اور نکہت ٹرائیلز میں اپنے اپنے مقابلے جیت جاتی ہیں تو پھر ان کے درمیان مقابلہ ہوگا اور فاتح کو اولمپک کوالیفائر میں اترنے کا موقع ملے گا۔خواتین کے 51 کلوگرام وزن کے زمرے میں دو دیگر باکسر جیوتی گلیا اور ریتو گریوال ہیں جنہوں نے کانپور میں خواتین قومی چمپئن شپ میں سونے اور چاندی کا تمغہ جیتا تھا۔
