واشنگٹن ۔ 21 اکٹوبر (ایجنسیز) صدر ڈونالڈ ٹرمپ کی اپنے روسی ہم منصب ولادیمیر پوتن کے ساتھ جلد ملاقات کی امیدیں تعطل کا شکار ہو سکتی ہیں۔ٹرمپ نے جمعرات کو پوتن کے ساتھ ایک ٹیلی فونک گفتگو کے بعد اعلان کیا تھا کہ دونوں نے اپنے اعلیٰ سطحی مشیروں کی ملاقات اگلے ہفتے کرانے پر اتفاق کیا ہے۔ انھوں نے اپنی ویب سائٹ ٹروتھ سوشل پر لکھا کہ امریکی وفد کی ابتدائی ملاقاتوں کی قیادت وزیرِ خارجہ مارکو روبیو کریں گے، ان کے ساتھ دیگر افراد بھی شامل ہوں گے جن کے نام بعد میں طے کیے جائیں گے۔تاہم وائٹ ہاؤس کے ایک عہدیدار نے سی این این کو بتایا کہ روبیو اور ان کے روسی ہم منصب سرگئی لاؤروف کے درمیان طے شدہ ملاقات عارضی طور پر ملتوی کر دی گئی ہے۔
ذرائع کے مطابق فوری طور پر اس تاخیر کی وجہ واضح نہیں ہو سکی، البتہ ایک ذریعے نے کہا کہ روبیو اور لاؤروف کے درمیان یوکرین پر روسی حملہ ختم کرنے کے امکانات کے بارے میں مختلف توقعات پائی جاتی تھیں۔یہ بھی واضح نہیں کہ لاؤروف ۔ روبیو ملاقات کے مؤخر ہونے کا بوڈاپسٹ (ہنگری) میں متوقع ٹرمپ – پوتن سربراہی اجلاس پر کیا اثر پڑے گا۔
