تہران: ایرانی وزیرخارجہ نے بغداد حملے سے متعلق ٹرمپ کے الزامات مسترد کرتے ہوئے کہا کہ وہ بیرون ملک اپنے ہی شہریوں کو خطرے میں ڈال کر آپ اپنی ناکامی سے توجہ نہیں ہٹاسکتے۔بغداد میں امریکی سفارت خانے پر راکٹ حملوں پر ڈونالڈ ٹرمپ نے ٹوئٹ کرتے ہوئے کہا کہ ایران کو ایک دوستانہ اور صحتمندانہ نصیحت کرنا چاہوں گا کہ اگر ایک امریکی کا بھی قتل ہوا تو میں ایران کو ذمہ دار ٹھہراؤں گا۔ایک اور ٹوئٹ میں امریکی صدر نے کہا کہ بغداد میں ہمارے سفارت خانے پر راکٹ سے حملے کیے گئے، 3 راکٹ حملوں کو ناکام بنایا گیا، یہ حملے ایران سے کیے گئے جب کہ ہم عراق میں امریکیوں کے خلاف حملوں میں اضافے کی باتیں سن رہے ہیں۔دوسری جانب ایرانی وزیرخارجہ جواد ظریف نے ڈونالڈ ٹرمپ کے الزامات کو مسترد کرتے ہوئے کہا کہ بیرون ملک اپنے ہی شہریوں کو خطرے میں ڈال کر آپ اپنے گھر میں تباہ کن ناکامی سے توجہ نہیں ہٹاسکتے۔ٹرمپ کی پوری میعاد میں ایران اور امریکہ کے تعلقات کشیدہ رہے ہیں۔ بنیادی مسئلہ ایرانی نیوکلیئر پروگرام ہے۔ ٹرمپ کی قیادت میں امریکہ نے نیوکلیئر معاملت سے دستبرداری اختیار کی جس سے تلخی بڑھ گئی۔
