واشنگٹن : اپنا دور اقتدار جلد مکمل کرنے والے امریکی صدر ڈونالڈ ٹرمپ نے کانگریس کی جانب سے منظور کردہ 740 بلین ڈالرز کا دفاعی بجٹ ویٹو کر دیا ہے۔ ٹرمپ کے مطابق وہ اس قانون کی حمایت نہیں کر سکتے کیونکہ یہ قومی سلامتی سے متصادم ہے اور یہ کہ چین اور روس کے لیے یہ ایک تحفہ ہے۔ انہوں نے بہت سے فوجی اڈوں کے نام تبدیل کرنے کے فیصلے پر بھی تنقید کی جو نسل پرستی کے خلاف مظاہروں کے تناظر میں کیا گیا۔ ٹرمپ نے افغانستان، جنوبی کوریا اور جرمنی سے امریکی فوجیوں کے نکالنے کے معاملے کو روکنے کی کوشش کو بھی غیر آئینی قرار دیا۔
