واشنگٹن ۔ 25 اکتوبر (ایجنسیز) امریکہ کے صدر ڈونالڈ ٹرمپ نے کہا کہ وہ جنوبی کوریا کے دورے کے دوران شمالی کوریا کے رہنما کم جونگ اْن سے ملاقات کی خواہش رکھتے ہیں۔ غیرملکی میڈیا کے مطابق امریکی صدر ڈونالڈ ٹرمپ دورہ ملائیشیا پر روانہ ہو گئے۔ انہوں نے روانگی سے قبل اس خواہش کا اظہار کیا کہ وہ جنوبی کوریا کے دورے کے دوران شمالی کوریا کے رہنما کم جونگ ان سے ملاقات کے خواہشمند ہیں۔ انہوں نے کہا کہ میں کم سے اچھی طرح واقف ہوں اور ہم ایک دوسرے کے ساتھ اچھے تعلقات رکھتے ہیں۔ دوسری جانب اہم امریکی عہدیدار نے بتایا کہ صدر ٹرمپ کے دورۂ جنوبی کوریا کے دوران شمالی کوریا کے رہنما سے ملاقات شیڈول کا حصہ نہیں۔ میڈیا کے مطابق امریکی صدر ڈونالڈ ٹرمپ ملائیشیا میں آسیان رہنماؤں کے47 ویں اجلاس میں شرکت کریں گے۔ وہ اجلاس کے بعد جاپان اور جنوبی کوریا میں ایپک اجلاس میں بھی شریک ہوں گے۔ جنوبی کوریا میں ایپک اجلاس کے موقع پر صدر ٹرمپ چینی صدر شی جن پنگ سے بھی ملاقات کریں گے۔ دوسری جانب ملائیشیا میں ہی امریکی وزیر خزانہ اسکاٹ بیسنٹ اور تجارتی نمائندہ جیمیسن گریئر کی قیادت میں امریکی وفد اور چینی نائب وزیرِاعظم ہی لی فینگ کی سربراہی میں چینی وفد کے درمیان تجارتی مذاکرات ہو رہے ہیں۔
