واشنگٹن، 29 ستمبر (یو این آئیٓ) امریکی صدر ڈونالڈ ٹرمپ نے کہا ہے کہ غزہ امن منصوبے کی تجاویز پر اسرائیل اور عرب رہنماؤں نے بہت اچھا رد عمل ظاہر کیا ہے ۔ امریکی صدر کا کہنا تھا کہ تمام لوگ معاہدہ کرنا چاہتے ہیں، نیتن یاہو سے ملاقات میں معاہدے کو حتمی شکل دیے جانے کی امید ہے۔ انہوں نے بتایا کہ تجاویز کا مقصد صرف غزہ میں نہیں بلکہ مشرق وسطیٰ میں وسیع امن تک پہنچنا ہے ۔ امریکی صدر نے کہا کہ تمام فریق پہلی بار کسی خاص مقصد کے لیے متحد ہیں اور پہلی بار کچھ خاص ہونے جا رہا ہے ۔ ان کا کہنا تھا کہ یہ معاہدہ ضرور مکمل کیا جائے گا اور ہم یہ کر کے دکھائیں گے۔ رپورٹس کے مطابق امریکی صدر ڈونالڈ ٹرمپ کی وائٹ ہاؤس میں اسرائیلی وزیراعظم سے ملاقات ہوگی۔ امریکی حکام کے مطابق ملاقات کا مقصد جنگ بندی معاہدے کا فریم ورک طے کرنا ہے ۔ یاد رہے کہ امریکی صدر ڈونالڈ ٹرمپ نے 2 روز قبل بھی غزہ جنگ بندی اور یرغمالیوں کی رہائی کا معاہدہ جلد ہونے کا دعویٰ کیا تھا۔ امریکی صدر نے صحافیوں سے گفتگو میں کہا تھا کہ وہ غزہ جنگ کے خاتمے اور یرغمالیوں کی رہائی کے لیے ایک معاہدے کے قریب پہنچ گئے ہیں۔
