واشنگٹن، 3 ستمبر (یو این آئی) صدر ڈونلڈ ٹرمپ نے صدر شی جن پنگ پر امریکہ کے خلاف سازش کرنے کا الزام لگادیا ہے ۔ تفصیلات کے مطابق امریکہ کے صدر ڈونلڈ نے چین پر روس اور شمالی کوریا سے مل کر سازش کا الزام لگا دیا ہے اور دوسری طرف جاپان کے ماضی کا ذکر کر کے اسے ایک پریشان کن صورت حال میں ڈال دیا۔ روئٹرز کے مطابق ڈونالڈ ٹرمپ نے بیجنگ میں چین کی سب سے بڑی فوجی پریڈ شروع ہوتے ہی، ٹروتھ سوشل پر ایک پوسٹ میں، چین کو جاپان سے آزادی حاصل کرنے میں مدد کرنے میں امریکی کردار پر روشنی ڈالی۔ ٹرمپ نے چینی صدر کو مخاطب کرتے ہوئے لکھا کہ براہ کرم ولادیمیر پوتن اور کم جونگ اُن کو میری نیک تمنائیں پہنچا دیں جب آپ لوگ امریکہ کے خلاف سازش کر رہے ہوں۔ ٹرمپ نے اس سے قبل صحافیوں سے گفتگو کرتے ہوئے کہا کہ وہ چین کے فوجی پریڈ کو امریکہ کیلئے کسی چیلنج کے طور پر نہیں دیکھتے اور انھوں نے چینی صدر شی جن پنگ کے ساتھ اپنے نہایت اچھے تعلقات برقرار رکھنے کا اعادہ کیا۔ دوسری طرف چہارشنبہ کے روز جاپان کے اعلیٰ ترین سرکاری ترجمان نے پریڈ پر تبصرہ کرنے سے گریز کرتے ہوئے کہا کہ ایشیا کی دو بڑی معیشتیں تعمیری تعلقات قائم کر رہی ہیں۔
