واشنگٹن، 5 ستمبر (سیاست ڈاٹ کام) امریکی صدر ڈونالڈ ٹرمپ نے اس ماہ ہونے والے اقوام متحدہ کی جنرل اسمبلی کے اجلاسکے دوران ایرانی صدر حسن روحانی کے ساتھ ملاقات کے اشارے دئیے ہیں۔ ٹرمپ نے چہارشنبہ کو کہا کہ وہ اس ملاقات کے امکان سے انکار نہیں کرتے ہیں۔جنرل اسمبلی کے اجلاس کے دوران مسٹر روحانی کے ساتھ ملاقات کے امکان کے سوال پر امریکی صدر نے کہا‘‘کچھ بھی ممکن ہے ’’۔اس سے قبل امریکہ نے منگل کو ایران کی خلائی ایجنسی پر پابندی عائد کرنے کا اعلان کیا تھا۔ ٹرمپ نے گزشتہ سال مئی میں ایران نیوکلیئر معاہدہ سے اپنے ملک کے الگ ہونے کا اعلان کیا تھا۔ اس کے بعد سے ہی دونوں ممالک کے تعلقات بہت ہی تلخ ہو گئے ہیں۔ اس نیوکلیئر معاہدے کی دفعات لاگو کرنے کے سلسلہ میں بھی شکوک و شبہات کے حالات بنے ہوئے ہیں۔قابل ذکر ہے کہ سال 2015 میں ایران نے امریکہ، چین، روس، جرمنی، فرانس اور برطانیہ کے ساتھ ایک معاہدہ پر دستخط کیا تھا۔ معاہدہ کے تحت ایران نے اس پر عائد اقتصادی پابندیوں کو ہٹانے کے عوض اپنے نیوکلیئر پروگرام کو محدود کرنے پر اتفاق کا اظہار کیا تھا۔