ٹرمپ کا واشنگٹن میں نیشنل گارڈ تعینات کرنے کا فیصلہ … ہلاری کلنٹن کی تنقید

   

واشنگٹن ۔ 12 اگست (ایجنسیز) امریکی صدر ڈونالڈ ٹرمپ کے واشنگٹن میں نیشنل گارڈ تعینات کرنے کے منصوبے پر رد عمل کا اظہار کرتے ہوئے سابق وزیر خارجہ ہلاری کلنٹن نے اسے “غیر متوازن” قرار دیا ہے۔ ان کا کہنا ہے کہ دار الحکومت میں پْر تشدد جرائم کی شرح گزشتہ 30 برسوں کی کم ترین سطح پر ہے۔سوشل میڈیا پلیٹ فارم “ایکس” پر اپنے بیان میں ہلاری نے لکھا کہ ٹرمپ اپنی کارروائی کو جواز دینے کی کوشش کر رہے ہیں، لیکن حقیقت یہ ہے کہ جرائم کی شرح تاریخی حد تک نیچے آ چکی ہے۔ انھوں نے امریکی محکمہ انصاف کے اعداد و شمار کا حوالہ دیتے ہوئے بتایا کہ 2024 میں پْر تشدد جرائم کی شرح 2023 کے مقابلے میں 35 فی صد کم ہوئی … ان میں قتل کے واقعات میں 32 فی صد، ڈکیتی میں 39 فی صد اور اسلحہ کے زور پر گاڑی چھیننے کے واقعات میں 53 فی صد کمی شامل ہے۔امریکی میڈیا اداروں Axios اور UNILAD نے نشان دہی کی ہے کہ ٹرمپ کے دعوے سرکاری اعداد و شمار سے متصادم ہیں۔ تاہم “واشنٹن فری بیکن” کی رپورٹ کے مطابق، واشنگٹن پولیس کے ایک اعلیٰ افسر کو اس الزام کی تحقیقات کے لیے انتظامی چھٹی پر بھیج دیا گیا ہے کہ کچھ جرائم کے اعداد و شمار میں ممکنہ طور پر رد و بدل کیا گیا، جس سے بعض اعداد کی درستگی پر سوالات اٹھے ہیں۔