واشنگٹن: امریکی صدر ڈونالڈ ٹرمپ نے جمعرات کو ایک بار پھر ہندوستان اور چین کے مابین سرحدی تنازعہ کوحل کرنے میں مدد کی پیشکش کی ہے ۔ ٹرمپ نے وائٹ ہاؤس میں صحافیوں سے گفتگو کرتے ہوئے کہا‘‘میرے علم میں ہیکہ چین اور ہندوستان کو اب مشکلات کا سامنا کرنا پڑ رہا ہے ۔ مجھے امید ہے کہ دونوں ممالک اس بحران سے نکلنے میں کامیاب ہوجائیں گے ۔ اگر ہم مدد کرسکتے ہیں تو ، ہم اسے کرنا پسند کریں گے ۔ ’’اس سے قبل مئی میں ٹرمپ نے ہندوستان چین سرحدی تنازعہ کے مسئلہ پر ثالثی کرنے کے بارے میں بھی بات کی تھی ، جسے بعد میں ہندوستان نے مسترد کردیا تھا۔وزیر خارجہ ایس جئے شنکر نے لداخ خطے میں جاری سرحدی تنازع کے حل کے لئے 10 ستمبر کو شنگھائی تعاون تنظیم کے اجلاس میں اپنے چینی ہم منصب وانگ یی سے ملاقات کی تھی۔ذرائع کے مطابق اس اجلاس میں ہندوستان نے لائن آف ایکچوول کنٹرول کے ساتھ مسلح چینی فوجیوں کے بڑے پیمانے پر جمع ہونے پر تشویش کا اظہار کیاتھا ۔