نیویارک : جمعرات کے روز امریکی کانگریس کے ڈیموکریٹس کی ایک رپورٹ میں دعویٰ کیا گیاہے کہ سابق صدر ڈونالڈ ٹرمپ کی بزنس کمپنیوں نے وائٹ ہاؤس میں ان کی صدارت کے دوران چین سمیت غیرملکی حکومتوں اور ان کے قائدین سے 7.8 ملین ڈالر یعنی 78 لاکھ ڈالر وصول کیے۔ ایوان کی نگران کمیٹی کے ڈیمو کریٹس نے اپنی رپورٹ میں لکھا کہ ، سعودی عرب ، ہندوستان، ترکیہ اور جمہوریہ کانگو ان تقریباً 20 ملکوں میں شامل تھے جن کے نمائندوں نے ٹرمپ کی صدارت کے دوران ان کے ہوٹل اور رئیل اسٹیٹ کے کاروبار کو رقوم کی ادائیگی کی۔ رپورٹ کے مصنفین نے دعویٰ کیا ہیکہ بیرونی ملکوں کی حکومتوں سے حاصل کردہ ایسے محصولات سے غیر ملکی حکومتوں کے نمائندوں سے خدمات کا معاوضہ لینے پر عائد آئینی پابندی کی خلاف ورزی ہوئی ہے۔ وائٹ ہاؤس برائے فروخت کے عنوان کے تحت اس رپورٹ میں کہا گیا کہ صدر کے طور پر ڈونالڈ ٹرمپ نے غیر ملکی حکومتوں اور ان کے قائدین سے 7.8 ملین ڈالر ادائیگیوں کی شکل میں قبول کیے ہیں ۔
