نیویارک : قانونی چارہ جوئیوں کا سامنا کرنیوالے امریکہ کے سابق صدر ڈونالڈ ٹرمپ کو ایک اور عدالتی جھٹکا، ٹیکس دستاویز حاصل کرنے کی سازش سے متعلق نیویارک ٹائمز کیخلاف سابق صدر کی جانب سے دائر مقدمہ خارج کردیا گیا، نیویارک کی عدالت نے ڈونالڈ ٹرمپ کو اخبار اور صحافیوں کو چار لاکھ ڈالر دینے کا حکم دیدیا۔ سابق صدر ٹرمپ نے سن دوہزار اکیس میں نیویارک ٹائمز اور تین صحافیوں کے خلاف مقدمہ کیا تھا کہ سازش کے ذریعہ ان کی ٹیکس دستاویز حاصل کی گئیں۔ نیویارک ٹائمز کی تحقیقات میں انکشاف کیا گیا تھا کہ رئیل اسٹیٹ کاروبار سے وابستہ ڈونالڈ ٹرمپ کا یہ دعویٰ درست نہیں کہ انہوں نے سارا کاروبار اپنی محنت سے بنایا۔ تحقیقات میں یہ بات سامنے آئی کہ ٹرمپ نے 413 ملین ڈالر کے مساوی رقم اپنے والد سے حاصل کی تھی اور اس کے لیے ایک شیل کمپنی کا استعمال کیا گیا تھا تاکہ ٹیکس سے بچا جاسکے۔