واشنگٹن ۔24 مارچ ۔( سیاست ڈاٹ کام ) کورونا وائرس سے بچاؤ کیلئے امریکی صدر ڈونالڈٹرمپ کی تجویز کردہ دوا استعمال کر کے ایک شخص نے صحتیابی کا دعویٰ کیا ہے، جبکہ ایک اور مریض اسی دوا کے استعمال سے انتقال کر گیا اور اس کی بیوی کی حالت تشویشناک ہے۔فلوریڈا کے ایک 52 سالہ شخص نے دعویٰ کیا ہے کہ صدرٹرمپ کی تجویز کردہ انسدادِ ملیریا کی دوا کے استعمال سے اس کی زندگی بچ گئی۔مریض نے ایک انٹرویو میں بتایا کہ میں کورونا وائرس کا شکار ہونے کے بعد 5 دن کمر درد، سر درد، کھانسی اور تھکاوٹ کا شکار رہا، اس وقت مجھے مشکل لگ رہا تھا کہ میں زندہ رہ پاؤں گا، کیونکہ ڈاکٹروں نے مجھے جواب دے دیا تھا۔مریض کا کہنا تھا کہ اس موقع پر میرے ایک دوست نے ملیریا کی اس دوا کے بارے میں بتایا اور مجھے کلوروکوئن دوا کے استعمال سے کورونا سے نجات ملی۔دوسری جانب اس دوا کے استعمال کے مضر اثرات بھی سامنے آ گئے ہیں، ایریزونا کے ایک شہری نے کورونا سے نمٹنے کیلئے خود ساختہ علاج کیا اور کلورو کوئن دوا استعمال کرنے سے ہلاک ہو گیا، جبکہ یہی دوا استعمال کرنے والی اس کی بیوی کی حالت بھی تشویش ناک ہے۔
