ملک بھر میں بڑے پیمانے پر دھاووں کا اعلان
واشنگٹن : امریکہ میں مجوزہ ڈونالڈ ٹرمپ انتظامیہ کے ایک اعلی سرحدی عہدیدار نے کہا کہ پیر کو صدر امریکہ کی حیثیت سے ڈونالڈ ٹرمپ کی حلف برداری کے بعد امریکی امیگریشن حکام کی جانب سے غیرقانونی تارکین وطن کی بڑے پیمانے پر گرفتاریاں عمل میں لائی جائیں گی ۔ واضح رہے کہ ڈونالڈ ٹرمپ نے اپنی انتخابی مہم کے دوران وعدہ کیا تھا کہ اگر وہ صدر منتخب ہوجاتے ہیں تو لاکھوں غیر قانونی تارکین وطن کو امریکہ سے واپس بھیج دیں گے ۔ مجوزہ ٹرمپ انتظامیہ میں سرحدی امور کے ذمہ دار ٹام ہومنس نے کہا کہ امیگریشن حکام کی جانب سے شکاگو اور دوسرے شہروں میں منگل ہی سے چھاپوں کا سلسلہ شروع کردیا جائیگا ۔ واضح رہے کہ وال اسٹریٹ جرنل اور دوسرے میڈیا اداروں نے بھی یہ انکشاف کیا تھا کہ ٹرمپ کی حلف برداری کے بعد ان کا انتظامیہ منگل سے ہی یہ چھاپے شروع کرنے کا منصوبہ رکھتا ہے ۔ مسٹر ہومن نے کہا کہ یقینی طور پر ملک بھر میں بڑے پیمانے پر دھاوے کئے جائیں گے ۔ شکاگو کئی شہروں میں سے ایک ہے ۔ ہومن سابق کارگذار ڈائرکٹر امیگریشن و کسٹمس انفورسمنٹ ہیں ۔ انہوں نے کہا کہ منگل کو ان کے محکمہ کی جانب سے اپنے کام کا آغاز کیا جائیگا ۔ ہم اس محکمہ کے بندھے ہاتھ کھول دیں گے اور مجرمین اور غیر قانونی تارکین وطن کی گرفتاریوں کا سلسلہ شروع کردیا جائیگا ۔ انہوں نے ایک انٹرویو میں یہ بات بتائی اور کہا کہ کسی نرمی کے بغیر امیگریشن قوانین پر عمل آوری کی جائیگی ۔ سب سے پہلے خطرات سے نمٹنے اور عوامی سلامتی کو یقینی بنانے پر توجہ دی جائے گی اور کسی کو بھی جو غیر قانونی ہو بخشا نہیں جائیگا ۔
مکیش اور نیتا امبانی ٹرمپ کی
حلف برداری میںشرکت کرینگے
واشنگٹن : ہندوستان کے ارب پتی تاجر مکیش امبانی اور ان کی شریک حیات نیتا امبانی امریکی صدر ڈونالڈ ٹرمپ کی حلف برداری تقریب میں شرکت کرینگے ۔یہ تقریب حلف برداری پیر 20 جنوری کو ہوگی ۔ دنیا کے چنندہ اور انتہائی اہم افراد تقریب میں شرکت کرنے والے ہیں جن میں مکیش اور نیتا امبانی بھی شامل ہونگے ۔ مکیش امبانی کے علاوہ ایلانمسک ‘ جیف بیزوس ‘ مارک زوکر برگ اور دوسرے بڑے تاجرین کے علاوہ فرانس کے ارب پتی تاجر ژیوئیر نیل بھی اپنی شریک حیات کے ساتھ اس تقریب میں موجود رہیں گے ۔
ٹرمپ کی حلف برداری کی تقاریب 4 روز جاری رہیں گی
واشنگٹن: ڈونالڈ ٹرمپ پیر 20 جنوری کو اپنے عہدے کی دوسری مدت کا حلف اٹھا رہے ہیں جبکہ حلف برداری کی چار روزہ تقاریب کا آغاز ہفتے سے ہورہا ہے۔ان میں سے کچھ تقاریب یہ ہیں۔ ہفتہ: کابینہ کا عشائیہ: منتخب نائب صدر جے ڈی وینس، نئی صدارتی کابینہ کے نامزد ارکان کے استقبالیہ میں شرکت کریں گے اور واشنگٹن میں ان کے اعزاز میں عشائیہ کی میزبانی کریں گے۔آتش بازی کا مظاہرہ:ورجینا کے شہر اسٹرلنگ میں واقع گالف کلب میں ہفتے کی شام ٹرمپ ایک استقبالیہ کی میزبانی کریں گے اور رات آتش بازی کا شو ہو گا۔ اتوار: نامعلوم سپاہی کی یادگار پر تقریب: منتخب صدر ٹرمپ آرلنگٹن میں واقع قومی قبرستان میں نامعلوم فوجی کی یادگار پر پھولوں کی چادر چڑھانے کی تقریب میں شرکت کریں گے۔ میگا ریلی: اتوار کی شام ٹرمپ واشنگٹن کے ڈاون ٹاون میں ’میگا وکٹری ریلی‘ کی قیادت کریں گے۔ یہ ریلی ان کی انتخابی مہم کے جلسوں کے طرز پر ہو گی۔اس ریلی میں معروف بینڈ کڈ راک، بلی رے سرکس، دی ویلج پیپل، لی گرین وڈ اور لبرٹی یونیورسٹی کا ایک میوزک گروپ اپنی پرفارمنس کا مظاہرہ کریں گے۔اس ریلی سے خطاب کرنے والوں میں ٹرمپ، وینس، ایلون مسک، ریسلنگ کے سابق اسٹارہلک ہوگن، اداکار جان وئٹ، یو ایف سی کی صدر ڈینا وائٹ، پورٹو ریگن ریگیٹن اسٹار اینوئل اے اے، ٹرننگ پوائنٹ کے بانی چارلی کرک اور قدامت پسند پاڈ کاسٹر میگن کیلی شامل ہیں۔کینڈل لائٹ ڈنر: اتوار کی رات ٹرمپ ایک کینڈل لائٹ ڈنر میں شرکت کریں گے جہاں ان کا خطاب متوقع ہے۔پیر:ٹرمپ کی حلف برداری پیر کو ہو رہی ہے۔ اس دن کا آغاز چرچ سروس میں شرکت سے ہو گا۔ٹرمپ دن کا آغاز وائٹ ہاوس کے قریب واقع سینٹ جانز ایپسکوپل چرچ میں سروس میں شرکت سے کریں گے، جو منتخب صدور کی ایک روایت ہے۔وائٹ ہاؤس ٹی: ٹرمپ اور میلانیا ٹرمپ سبکدوش صدر جو بائیڈن اور خاتون اول جِل بائیڈن سے وائٹ ہاوس میں چائے پر ملاقات کریں گے۔ حلف برداری تقریب: ٹرمپ کی حلف برداری کی تقریب یو ایس کیپٹل کے روٹانڈا ہال میں ہو گی۔ تقریب میں نبراسکا یونیورسٹی کا میوزک گروپ استقبالیہ نغمہ پیش کرے گا۔