واشنگٹن۔ 7 ڈسمبر ۔(سیاست ڈاٹ کام) امریکہ کے صدر ڈونالڈ ٹرمپ نے اس رپورٹ کی تردید کی ہے جس میں کہا گیا تھا کہ وہ اب بھی کال کرنے کیلئے ذاتی موبائیل فون کا استعمال کرتے ہیں۔ ٹرمپ نے گذشتہ روز کہا وہ کسی بھی طرح کے ذاتی موبائیل فون کا نہیں بلکہ حکومت کی طرف سے جاری اور منظورشدہ فون کا ہی استعمال کرتے ہیں۔انہوں نے ٹوئٹ کر کے کہا کہ یہ سی این این کی بالکل غلط رپورٹ ہے کہ سیکورٹی انتباہات کے باوجود میں اب بھی ذاتی موبائیل فون استعمال کر رہا ہوں ۔صدر نے کہاکہ میرے پاس برسوں سے کوئی بھی ذاتی موبائیل فون نہیں ہے ۔ میں صرف حکومت کی طرف سے جاری اور منظورشدہ فون کا ہی استعمال کرتا ہوں۔خیال رہے کہ سی این این کی ایک رپورٹ میں کہا گیا تھا کہ غیر ملکی انٹیلی جنس ایجنسیوں کی طرف سے خفیہ بات چیت اور پیغامات کا پتہ لگائے جانے کے خطرے کے باوجود ٹرمپ اب بھی ذاتی موبائیل فون کا ہی استعمال کر رہے ہیں۔
