حیدرآباد۔ 17مارچ (یواین آئی)تلنگانہ حکومت کی جانب سے زیرالتواٹریفک چالانات میں رعایت سے حکومت کے خزانے میں بھاری رقم جمع ہوئی ۔ چالانات کی ادائیگی کیلئے معلنہ رعایتوں پر موٹرسائیکل سواروں کی طرف سے خاص ردعمل مل رہا ہے ۔ گزشتہ 15 دنوں میں ریاست میں 1.30 کروڑ چالانات ادا ہوئے ہیں۔ اس سے 130 کروڑ روپے سرکاری خزانے میں جمع ہوئے ۔ان میں سب سے زیادہ حیدرآباد، سائبرآباد اور رچہ کونڈہ کمشنریٹس سے 80 فیصد ٹریفک چالانات ادا کردیے گئے ہیں۔ سینئر عہدیدار نے بتایا کہ اب تک 500 کروڑ روپے چالانات پر رعایت دینے کے بعد 130 کروڑ روپے وصول ہوئے ہیں۔انہوں نے کہا کہ زیر التواء ٹریفک چالان کے ذریعہ 300 کروڑ روپے جمع ہونے کا امکان ہے ۔ گاڑی رانوں کو رعایت سے فائدہ اٹھانے کا مشورہ دیا جاتا ہے ۔ دریں اثنا، سینئر پولیس حکام نے فیلڈ لیول افسران کو ریاست میں خصوصی مہم تیز کرنے کے احکامات جاری کیے ہیں۔ حکومت نے یکم مارچ سے 31 مارچ تک زیرالتواٹریفک چالانات کی ادائیگی پر رعایت دی جس میں بائک اور آٹو پر 75 فیصد، کاروں پر 50 فیصد اور آر ٹی سی بسوں پر 70 فیصد رعایت شامل ہے ۔
