میلبورن ۔ ٹسٹ کرکٹ کے 150 سال مکمل ہونے کا جشن منانے کے لیے آسٹریلیا اور انگلینڈ ٹسٹ میچ کھیلیں گے۔کرکٹ آسٹریلیا نے واحد ٹسٹ میچ کی تفصیلات جاری کردیں جس کے مطابق آسٹریلیا اور انگلینڈ کے درمیان یہ ٹسٹ میچ مارچ 2027 میں کھیلا جائے گا۔ ٹسٹ کرکٹ کے 150 سال مکمل ہونے پر ٹسٹ میچ کی میزبانی تاریخی میلبورن کرکٹ گراونڈ کرے گا، 15 تا 19 مارچ 1877 میں ٹسٹ میچ آسٹریلیا اور انگلینڈ کے درمیان میلبورن میں کھیلا گیا تھا۔ کرکٹ آسٹریلیا نے کہا ہے کہ ٹسٹ کرکٹ کے 150 سال مکمل ہونے پر بھرپور جشن منایا جائے گا، 1978-79 کے سیزن کے بعد پہلی مرتبہ مارچ میں آسٹریلیا میں ٹسٹ میچ ہوگا، آخری مرتبہ پاکستان کے خلاف ٹسٹ مارچ میں ہوا جوکہ 29 مارچ کو ختم ہوا تھا۔ٹسٹ کرکٹ کے 100 برس مکمل ہونے پر ٹسٹ 12 تا 17 مارچ 1977 کو ایم سی جی میں ہی کھیلا گیا۔کرکٹ آسٹریلیا نے 2030-31 سیزن تک کے انٹرنیشنل وینیو رائٹس کا اعلان کردیا ہے، باکسنگ ڈے ٹسٹ ایم سی جی اور نئے سال کا پہلا ٹسٹ سڈنی میں ہی ہوگا۔
