حیدرآباد۔17جولائی (سیاست نیوز) ٹماٹر کی قیمتوں میں اضافہ کے بعد اب پیاز نے شہریوں کی آنکھ میں آنسو لانے شروع کردئیے ہیں۔ شہر حیدرآباد و سکندرآباد میں گذشتہ ایک ہفتہ میں پیاز کی قیمتوں میں 5 روپئے فی کیلو کا اضافہ ریکارڈ کیا گیا ہے اور آئندہ دنوں میں پیاز کی قیمتوں میں مزید اضافہ کے خدشات ظاہر کئے جا رہے ہیں۔ تاجرین کے مطابق ہر سال موسم باراں کے دوران پیاز کی قیمتوں میں اضافہ ریکارڈ کیا جاتا ہے لیکن اس مرتبہ ملک کی مختلف ریاستوں کے علاوہ تلنگانہ کے بیشتر اضلاع میں موسلادھار بارش کے سبب پیاز کی قیمتوں میں قبل ازوقت اضافہ ریکارڈ کیا جا رہاہے جبکہ سابق میں ماہ اگسٹ کے بعد پیاز کی قیمتوں میں اضافہ ریکارڈ کیا جاتا تھا لیکن اب جولائی کے وسط میں ہی پیاز کی قیمتوں میں اضافہ ریکارڈ کئے جانے کی وجہ سے تاجرین میں پریشانی دیکھی جانے لگی ہے اور شہریوں پر بھی مہنگائی کی مار پڑنے لگی ہے۔ گذشتہ چند ہفتوں سے شہر حیدرآباد میں ٹماٹر کی قیمتوں کے علاوہ دیگر ترکاریوں کی قیمتوں میں ریکارڈ کئے جانے والے اضافہ کے سبب شہریوں کو مشکل حالات کا سامنا کرنا پڑرہا تھا اب پیاز کی قیمتوں میں اندرون ایک ہفتہ 5روپئے فی کیلو تک کے اضافہ کے بعد کہا جا رہاہے کہ مہنگائی کا شکار شہریوں کو مزید مشکل صورتحال کا سامنا کرنا پڑسکتا ہے۔پیاز کے ٹھوک تاجرین کا کہناہے کہ پڑوسی ریاستوں میں جاری بارش کے علاوہ تلنگانہ کے اضلاع میں ہونے والی بارشوں کے سبب پیاز کی فصلوں کو ہونے والے نقصان کے نتیجہ میں یہ صورتحال پیدا ہوئی ہے لیکن توقع کی جا رہی ہے کہ اس صورتحال پر جلد ہی قابو پالیا جائے گا اور پیاز کی قیمتوں میں ہونے والے اضافہ پر قابو پانے کے سرکاری طور پر اقدامات کئے جائیں گے۔ ترکاریوں کی قیمتوں میں ہونے والے اضافہ سے نمٹنے کے لئے محکمہ زراعت کی نگرانی میں چلائے جانے والے رعیتو بازاروں میں قیمتوں پر کڑی نظررکھنے کے اقدامات کئے جار ہے ہیں لیکن رعیتو بازار میں کاروبار کرنے والوں کا کہناہے کہ انہیں جو قیمتوں میں ترکاریاں حاصل ہورہی ہیں ان پر اپنا منافع رکھتے ہوئے وہ ترکاریوں کی فروخت انجام دے رہے ہیں جبکہ اب پیاز کی قیمتو ںمیں ہونے والے اضافہ کے بعد محکمہ زراعت کی بھی مشکلات میں اضافہ کا خدشہ ہے کیونکہ پیاز کی قیمتوں میں اگر اضافہ کا سلسلہ جاری رہتا ہے تو ایسی صورت میں حکومت کو رعایتی قیمتوں میں پیاز کی فروخت کے اقدامات کرنے پڑسکتے ہیں ۔م
