دبئی۔28 مئی(سیاست ڈاٹ کام) بین الاقوامی کرکٹ کونسل (آئی سی سی) نے اس سال اکتوبر۔نومبر میں آسٹریلیا میں ٹی 20 ورلڈ کپ کرکٹ ٹورنمنٹ ملتوی کرنے کی خبروں کو مسترد کر دیا ہے، لیکن اس بات کی بھی قیاس آرائی تیز ہوگئی ہیں کہ کورونا وائرس کی وجہ سے ٹورنمنٹ کو 2022 تک ملتوی کیا جا سکتا ہے۔میڈیا میں ایسی خبریں ہیں کہ آئی سی سی کے ارکان کے درمیان اس بات پر اتفاق ہے کہ اس سال ٹی 20 ورلڈ کپ عالمی وبا کورونا وائرس کی وجہ سے سال 2022 تک ملتوی کیا جا سکتا ہے۔ اس بات پر آئی سی سی بورڈ کے ہونے والے اجلاس میں کوئی فیصلہ ہوگا۔آئی سی سی بورڈ کے اجلاس میں کورونا وائرس کی وجہ سے پیدا صورتحال سے کرکٹ کے متاثر ہونے اور ورلڈ کپ کے سلسلے میں غور کیا جائے گا۔ ورلڈ کپ آسٹریلیا میں 18 اکتوبر سے 15 نومبر تک کھیلا جانا ہے۔ آئی سی سی کا اگرچہ کہنا ہے کہ اس نے ٹی 20 ورلڈ کپ ملتوی کرنے کے بارے میں ابھی کوئی فیصلہ نہیں کیا ہے اور آسٹریلیا میں اس سلسلے میں تیاریاں چل رہی ہیں۔آئی سی سی رکن کورونا وائرس کی وجہ سے مختلف متبادل پر غور کر رہے ہیں جس میں یہ 2021 کے اوائل میں منعقد کروانے سے لے کر 2022 میں منعقد کرنے کے متبادل شامل ہیں۔ آئی سی سی بورڈ کے ایک سینئر عہدیدار کے مطابق کورونا وائرس کی وجہ سے اس سال ورلڈ کپ منعقد کرنا کافی مشکل ہوگا۔حالانکہ باقاعدہ اعلان ہونے کا امکان مشکل نظر آرہا ہے لیکن میزبان اور براڈ کاسٹر کے مفادات کو دیکھتے ہوئے آئی سی سی کو جلد ہی فیصلہ کرنا ہوگا۔
