ایمسٹرڈم : نیدرلینڈ نے آئندہ ماہ متحدہ عرب امارات اور عمان میں ہونے والے آئی سی سی ٹی 20 ورلڈ کپ کے لیے اپنی 15 رکنی ٹیم کا اعلان کردیا ہے ۔ تجربہ کار پیٹر سیلار کی قیادت والی اس ٹیم میں ان 12 کھلاڑیوں نے واپسی کی جو دو سال قبل ورلڈ کپ کوالیفائر ٹورنمنٹ میں کھیلے تھے ۔ وہیں عالمی کپ کوالیفائر ٹیم سے باہر ہونے والے 37 سالہ اسٹیفن مائبرگ نے قومی سطح پر اورمختلف بین الاقوامی وائٹ بال میچوں میں مسلسل رنز بنانے کی بدولت ٹیم میں جگہ حاصل کی ہے ۔ ٹوبیاس ویزے اور شین سنیٹر بھی بطور ریزرو کھلاڑی ٹیم میں شامل ہوئے ہیں۔ نیدرلینڈ چوتھی مرتبہ ٹی 20 ورلڈ کپ میں حصہ لے رہا ہے ۔ مائبرگ کے پاس پچھلے ٹی 20 ورلڈ کپ کا تجربہ ہے ، جس میں انہوں نے 145.83 کے اسٹرائیک ریٹ اور 31.11 کی اوسط سے 280 رنز بنائے تھے ۔
