ٹوکیو۔5 جون (سیاست ڈاٹ کام) کورونا وائرس سے نہ صرف ٹوکیو 2020 بلکہ 2024 پیرس اولمپکس گیمزکے منتظمین بھی پریشان ہیں۔ جاپانی منتظمین چاہتے ہیں کہ میگا ایونٹ نسبتاً چھوٹے پیمانے پرکرایا جائے۔ ٹوکیو کے گورنر نے کہا کہ کورونا کے سبب گیمز میں عہدیداروں اور شائقین کی تعداد میں کمی کی جاسکتی ہے۔ افتتاحی اور اختتامی تقاریب مختصر اور نسبتاً سادہ رکھنے پر غور کیا جارہا ہے۔ ایتھلیٹس، عہدیداروں اور تماشائیوں کیلئے کورونا ٹسٹ لازمی قرار دیا جاسکتا ہے۔اس طرح اخراجات میں بھی واضح کمی ہوگی۔پیرس گیمز کمیٹی کے مطابق گیمز کی تیاری کے انداز میں تبدیلی لانی شروع کردی ، اس سلسلے میں بین الاقوامی اولمپک کمیٹی کے کوآرڈینیشن کمیشن نے پیرس 2024 آرگنائزنگ کمیٹی اور اس کے شراکت داروں کے ساتھ ویڈیوکانفرنس کی۔ جس میں اولمپک اور پیرا اولمپکس کے انعقاد سے متعلق تفصیلی غورکیا گیا ، اجلاس میں یہ تجویز بھی سامنے آئی کہ پیرس گیمز میں عہدیداروں کی تعداد میں کمی کی جائے۔ منتظمین نے اولمپکس ولیج کو توسیع دینے سے انکار کرتے ہوئے کھلاڑیوں کے لئے بیڈ کی تعداد 17ہزار سے کم کر کے 14ہزار کرنے کی تجویز دی۔
