نئی دہلی۔7 ستمبر (سیاست ڈاٹ کام )آئی ایس ایس ایف نشانے بازی ورلڈ کپ کے مکسڈ ٹیم ایونٹ میں گولڈ میڈل حاصل کرنے والی ہندستانی شوٹر اپورو چندیلا نے کہا کہ ان کی اگلے سال ہونے والے ٹوکیو اولمپکس کے لئے تیاریاں درست سمت میں چل رہی ہے۔حال ہی میں برازیل میں ختم ہوئے نشانے بازی عالمی کپ میں بہترین کارکردگی کا مظاہرہ کر کے واپس لوٹے ہندستانی نشانے بازوں نے یہاں ہندستانی کھیل اتھارٹی کے ہیڈ کوارٹر میں وزیر کھیل کرن ریجیجو سے ملاقات کی۔اپورو نے کہاکہ حالیہ ٹورنمنٹوں میں ہم نے اچھی کارکردگی کا مظاہرہ کیا ہے۔ ایشین چمپئن شپ سے پہلے کیمپ لگنے کی امید ہے جس سے ہم یہاں کے ماحول میں ڈھل سکیں اور مجھے امید ہے کہ آنے والے ٹورنمنٹوں میں بھی ہم بہتر کریں گے۔ برازیل کا تجربہ ہمیں اولمپکس اور دیگر ٹورنامنٹوں میں کام آئے گا۔ ہمارا اعتماد اس جیت سے بڑھا ہے۔انہوں نے کہاکہ ہم نے یہاں اچھی کارکردگی کی لیکن آگے کے لئے ہمیں ایسے ہی محنت کرنی پڑے گی۔ اس مرتبہ میں نے مکسڈ میں گولڈ جیتا لیکن انفرادی زمرے میں کامیاب نہیں ہو سکی۔ اگرچہ میری کارکردگی اس سال بہتر رہی ہے۔ میں نے اس سال دو میڈلس جیتے ہیں اور چین میں بہت کم فرق سے میڈل جیتنے سے چوک گئی تھی۔ میں فی الحال اس کی کارکردگی سے مطمئن ہوں لیکن آگے اور محنت کرنی ہے۔ ہندستانی نشانے بازوں کی کارکردگی پر اپورو نے کہاکہ ہماری کارکردگی ورلڈ کپ میں شاندار رہی۔ ہم نے اس سال کے چار ورلڈ کپ میں بہترین کارکردگی کا مظاہرہ کیا اور ہم آنے والے وقت میں بھی اپنی یہ کارکردگی برقرار رکھنا چاہتے ہیں۔انہوں نے کہا کہ میں نے اپنے تجربے سے کافی کچھ سیکھا ہے، میں نے 2008 میں شوٹنگ شروع کی تھی اور اب مجھے اس میں 11 سال ہو چکے ہیں۔ اس دوران کئی اتار چڑھاو دیکھنے کو ملے لیکن میں نے صرف اپنی کارکردگی پر توجہ مرکوز کی۔انہوں نے کہا کہ 2008 بیجنگ اولمپکس کے گولڈ میڈل یافتہ نوین بندرا ان کے ترغیب کار ہیں اور انہوں نے بندرا سے تحریک لے کر ہی شوٹنگ میں آنے کا فیصلہ کیا تھا۔
