نئی دہلی۔4 اکٹوبر (سیاست ڈاٹ کام) ہندوستانی ٹینس اسٹار ثانیہ مرزا کرکٹ ٹیموں کی ناکامی کا ذمہ دار کھلاڑیوں کی بیگمات کو قرار دینے پر ناراض ہیں۔ایک تقریب میں جب ثانیہ مرزا سے پوچھا گیا کہ شعیب ملک کی اہلیہ ہونے کے ناطے ورلڈ کپ میں پاکستان کی شکست کا ذمہ دار انھیں ٹھہرایا جارہا تھا، تو ثانیہ مرزا نے کہاکہ آخر کھلاڑیوں کی خراب کارکردگی کا ذمہ دار ان کی بیوی یا ساتھی کو کیوں ٹھہرایا جاتا ہے، یہاں پر جب ویراٹ کوہلی زیرو پر آئوٹ ہوں تو تنقید انوشکا شرما پر شروع ہوجاتی ہیں۔ بیویوں اور پارٹنرز پر یہ کہہ کر دورے پر پابندی عائد کردی جاتی ہے کہ ان کی وجہ سے کھلاڑیوں کی توجہ منتشر ہوگئی، یہ سوچ غلط ہے، بیویاں توجہ منتشر نہیں کرتیں بلکہ کھلاڑیوں کا حوصلہ بڑھاتی ہیں۔یاد رہے کہ ورلڈ کپ کے دوران ہندوستان اور پاکستان کے مقابلے میں پاکستانی ٹیم کی شکست کے بعد ثانیہ مرزا کو شدید تنقید کا سامنا کرنا پڑا تھا اور شائقین نے اہم مقابلے سے قبل شعیب ملک اور ثانیہ کے ساتھ دیگر کھلاڑیوں کی حقہ پارلر میںموجودگی پر سخت ناراضگی کا اظہا رکیا تھا۔
