ممبئی: شیوسینا (ادھو ٹھاکرے دھڑے) کے رہنما سنجے راوت نے کہا ہے کہ وہ 20 جنوری سے کانگریس کے سابق صدر راہل گاندھی کی بھارت جوڑو یاترا میں شامل ہوں گے۔ شیوسینا کے بانی بالاصاحب ٹھاکرے کے کشمیر سے خصوصی لگاؤ کا حوالہ دیتے ہوئے راوت نے کہا کہ وہ بھارت جوڑو یاترا میں جموں و کشمیر میں شامل ہوں گے۔ انہوں نے کہا، “ملک کے لوگ پہلے ہی ‘بھارت جوڑو یاترا’ میں شامل ہو چکے ہیں جس نے راہل گاندھی کی قیادت میں اب تک تقریباً 4000 کلومیٹر کا فاصلہ طے کیا ہے۔ جموں و کشمیر ایک حساس علاقہ ہے۔ کشمیر کے ساتھ بالاصاحب ٹھاکرے کی وابستگی تھی۔ ایک خاص تعلق، اس لیے وہاں شیو سینا کی نمائندگی کرنے کے لیے میں ‘بھارت جوڑو یاترا’ میں شامل ہوں گا۔
