دبئی۔15 اکٹوبر (سیاست ڈاٹ کام ) انٹرنیشنل کرکٹ کونسل نے آئی سی سی ایونٹس کے سیمی فائنل اور فائنلز میں سوپر اوور کے قوانین میں تبدیلی کردی ہے، اب ناک آوٹ میچ میں سوپر اوور ٹائی ہونے پر باونڈریز نہیں گنی جائیں گی بلکہ دوبارہ سوپر اوور کھیلا جائے گا۔ انٹر نیشنل کرکٹ کونسل نے ورلڈ کپ سمیت آئی سی سی ٹورنمنٹس کے سیمی فائنل اور فائنل میں سوپر اوور کا قانون تبدیل کردیا ہے۔ لارڈز میں جولائی میں منعقدہ ورلڈ کپ کے فائنل میں انگلینڈ کو نیوزی لینڈ کے خلاف متنازعہ انداز میں زیادہ چوکے مارنے پر ورلڈکپ کا فاتح قرار دیا گیا تھا۔ اس قانون پر آئی سی سی کو شدید تنقید کا نشانہ بنایا گیا تھا۔ یہ فیصلہ دبئی میں آئی سی سی بورڈ اجلاس میں کیا گیا۔ آئی سی سی نے کہنا ہے کہ اگر آئی سی سی ایونٹ کے سیمی فائنل اور فائنل کا فیصلہ سوپر اوور میں ہوگا تو فیصلہ زیادہ چوکوں کی بنیاد پر نہیں ہوگا۔ اجلاس کے بعد جاری ہونے والے اعلامیے کے مطابق آئی سی سی نے گورنس کے لئے ایک ورکنگ گروپ تشکیل دیا ہے ۔ گورنس کا ورکنگ گروپ ، آئی سی سی کے ڈھانچے پر اپنی تجاویز آئی سی سی کو دے گا۔علاوہ ازیں آئی سی سی نے خواتین کے انڈر19 ورلڈ کپ کی میزبانی بنگلہ دیش کو دے دی ہے۔ بنگلہ دیش یہ ٹورنامنٹ2021 میں کرائے گا۔ خواتین ورلڈ کپ انڈر 19 فارمیٹ پر کھیلا جائے گا۔ آئی سی سی نے2023 کے بعد سے ہر سال آئی سی سی ایونٹ کروانے کا فیصلہ کیا ہے۔ 2023سے2031 تک آٹھ سال کے دوران مردوں اور خواتین کے آٹھ آٹھ ٹورنمنٹس ہوں گے۔ اس میں انڈر19مردوں اور خواتین کے چار چار ٹورنمنٹس بھی شامل ہیں۔ آئی سی سی نے زمبابوے پر عائد پابندی بھی اٹھانے کا اعلان کیا ہے۔ یہ فیصلہ زمبابوے حکام سے ملاقات کے بعد بورڈ اجلاس میں کیا گیا۔ اس فیصلے کی روشنی میں زمبابوے انڈر 19کرکٹ ٹیم ورلڈ کپ میں شرکت کرسکے گی۔ آئی سی سی نے نیپال پر عائد پابندی بھی اٹھا لی ہے۔علاوہ ازیں انٹر نیشنل کرکٹ کونسل اجلاس میں فیو چر ٹور پروگرام کی تبدیلی اور ورلڈ ٹی 20 ایک سال جبکہ ورلڈ کپ 3 سال بعد کرانے کی تجویز بھی سامنے آئی ہے جس کے لئے پاکستان ، سری لنکہ، جنوبی افریقہ،بنگلہ دیش کی خاموش حمایت اور ہندوستانی بورڈ کی ترجمانی کرنے والے عہدیدران کی بھی غیر معمولی دلچسپی سامنے آئی ہے۔ چیف ایگزیکٹو مانوسواہنی انگلینڈ، آسٹریلیا، نیوزی لینڈ اور ویسٹ انڈیز بورڈ کی مخالفت باوجود ایف ٹی ایف کی مجوزہ تبدیلی کی فوری منظوری کے لئے کوشاں تھے۔ بی سی سی آئی کے سی ای او راہول جوہری بھی تجویز کے حق میں نہیں انہوں نے کہہ دیا تھا کہ اس پر بات بی سی سی آئی انتخابات کے بعد ہونی چاہیے۔ 2023 سے 2028کے فیوچر ٹور پروگرام میں تبدیلی اور بڑے ایونٹس کے دورانیے میں کمی سے میڈیا رائٹس اور کرکٹ آمدنی کے حوالے سے بی سی سی آئی کی کمائی کم ہوسکتی ہے۔واضح رہے جولائی میں منعقدہ آئی سی سی ونڈے ورلڈ کپ کا جو فائنل انگلینڈ اور نیوزی لینڈ کے درمیان کھیلا گیا تھا اس کا نتیجہ اخذ کرنے کیلئے باونڈریز کو بنیاد بنیا گیا تھا جس پر ہر گوشے سے تنقید ہوئی تھی۔
