مغربی بنگال ترقی یافتہ صنعتی ریاست بن سکتا ہے، وزیر اعظم کا بی جے پی اجتماع سے خطاب
درگاپور (مغربی بنگال)۔ 18 جولائی (یواین آئی) وزیر اعظم نریندر مودی نے مغربی بنگال کی ترنمول کانگریس (ٹی ایم سی) حکومت کو ریاست میں سرمایہ کاری، روزگار اور ترقی کے راستے میں رکاوٹ بننے والی دیوار قرار دیتے ہوئے کہا ہے کہ ریاست تب ہی ترقی کر سکے گی جب ٹی ایم سی کی دیوار گرے گی۔ مودی یہاں بی جے پی کی طرف سے منعقدہ ایک اجتماع سے خطاب کر رہے تھے ۔ انہوں نے کہا کہ ٹی ایم سی کی بدعنوانی، بھتہ خوری اور انارکی کی وجہ سے ملک اور دنیا کے سرمایہ کار وسائل سے مالا مال مغربی بنگال میں سرمایہ کاری کرنے سے ڈرتے ہیں۔ کبھی ایک ترقی یافتہ صنعتی صوبہ رہی اس ریاست میں درگاپور اور آسنسول صنعتی بیلٹ میں صنعتیں بند ہو رہی ہیں۔ ریاست کے نوجوانوں کو روزی روٹی کے لیے دوسری ریاستوں میں جانا پڑ رہا ہے ۔ مودی نے کہا، ‘میں یقین دلانے آیا ہوں کہ مغربی بنگال کے حالات کو بدلا جا سکتا ہے ۔ بی جے پی کے اقتدار میں آنے کے چند سال میں مغربی بنگال ملک کی سب سے ترقی یافتہ صنعتی ریاستوں میں سے ایک بن سکتا ہے ۔’ انہوں نے کہا کہ مغربی بنگال پہلے برآمدات کا مرکز تھا۔ اس میں قدرتی وسائل ہیں۔ ریاست کے پاس میک ان انڈیا کو طاقت دینے کے تمام ذرائع ہیں لیکن مغربی بنگال کی ٹی ایم سی حکومت ترقی کی راہ میں دیوار کی طرح کھڑی ہے ۔ جس دن یہ دیوار گرے گی، ریاست نئی رفتار سے آگے بڑھے گی۔ ٹی ایم سی کی حکمرانی کی دیوار گرے گی تو تبدیلی آئے گی۔ آسام اور تریپورہ میں بی جے پی حکومتوں کی قیادت میں تیز رفتار ترقی کا ذکر کرتے ہوئے انہوں نے مغربی بنگال کے لوگوں سے اپیل کی کہ وہ بی جے پی کو موقع دیں اور ریاست میں تبدیلی لائیں۔ وزیر اعظم نے کہا کہ دنیا کو ہندوستان کی پہلی خاتون ایلوپیتھک ڈاکٹر دینے والی اس ریاست میں آج بیٹیاں اسپتالوں اور کالجوں میں محفوظ نہیں ہیں۔ ان کے خلاف مظالم کرنے والوں کو ٹی ایم سی قائدین اور حکومت تحفظ فراہم کرتی ہے ۔ انہوں نے ریاست کے عوام سے بی جے پی کو موقع دینے کی اپیل کرتے ہوئے کہا کہ اگر بی جے پی کو حکومت بنانے کا موقع ملتا ہے تو ریاست چند برسوں میں دوبارہ صنعتی لحاظ سے سرکردہ ریاستوں میں شامل ہوجائے گی۔