دبئی: آئی سی سی ٹی ٹوئنٹی ورلڈکپ کے سوپر 12 مرحلے میں پاکستان نے یکطرفہ مقابلے میں ہندوستان کو 10 وکٹوں سے شکست دیدی۔دبئی میں کھیلے گئے اس میاچ میں پاکستان کے کپتان بابر اعظم نے ٹاس جیت کر ہندوستان کو بیٹنگ کی دعوت دی ، ہندوستان نے پہلے کھیلتے ہوئے مقررہ 20 اوورز میں 7 وکٹوں کے نقصان پر 151 رنز بنائے، جواب میں پاکستان نے 152 رنز کا نشانہ بغیر کسی نقصان کے اٹھارویں اوور میں باآسانی حاصل کرلیا۔ پہلے اوور میں شاہین شاہ نے اوپنر روہت شرما کو صفر پر پویلین بھیج دیا۔ کے ایل راہول3 رنز بناکر شاہین آفریدی کا شکار بنے۔ ٹیم انڈیاکی تیسری وکٹ 31 رنز پر گری جب حسن علی نے سوریا کمار کو آؤٹ کیا۔اس کے بعد کپتان ویراٹ کوہلی اور وکٹ کیپر رشبھ پنت کے درمیان 53 رنز کی شراکت ہوئی لیکن ٹیم انڈیا کا اسکور جب 84 رنز پر پہنچا تو رشبھ پنٹ 39 رنز بنا کر شاداب خان کا شکار بنے۔اس کے علاوہ رویندرا جڈیجا 13 اور ہاردک پانڈیا 11 رنز ہی بناسکے۔ ہندوستان نے مقررہ 20 اوورز میں 7 وکٹوں کے نقصان پر 151 رنز بنائے۔ ویرات کوہلی 57 اور رشبھ پنٹ 39 رنز نمایاں رہے۔پاکستان کی جانب سے شاہین شاہ آفریدی نے 3 ،حسن علی نے 2 وکٹیں حاصل کیں جبکہ شاداب خان اور حارث رؤف نے ایک، ایک کھلاڑی کو آؤٹ کیا۔جواب میں پاکستانی اوپنرز نے محتاط انداز میں بیٹنگ کا آغاز کیا۔پاکستان کے کپتان بابر اعظم اور محمد رضوان نے گراؤنڈ کے چاروں طرف دلکش اسٹروک لگائے اور 152 رنز کی شاندار شراکت داری نبھائی اور انڈین بولرز کو وکٹ لینے کا کوئی موقع نہ دیا۔محمد رضوان نے شاندار بیٹنگ کرتے ہوئے 79 رنز بنائے جبکہ بابر اعظم نے 68 رنز کی اننگز کھیلی۔واضح رہے کہ پاکستان نے ٹی ٹوئنٹی ورلڈ کپ میں پہلی بار ہندوستانکو شکست دی۔پاکستان کے شاہین شاہ آفریدی کو شاندار بولنگ کرنے پر میچ کا بہترین کھلاڑی قرار دیا گیا۔
