ہم خیال پارٹیوں سے مشاورت کا فیصلہ،ناما ناگیشور راؤ کی دہلی میں پریس کانفرنس
حیدرآباد۔/11 جولائی، ( سیاست نیوز) لوک سبھا میں بی آر ایس کے فلور لیڈر ناما ناگیشور راؤ نے اعلان کیا کہ یکساں سیول کوڈ کے خلاف بی آر ایس جدوجہد کرے گی اور مودی حکومت کو یکساں سیول کوڈ کے نفاذ کا منصوبہ ترک کرنا ہوگا۔ نئی دہلی میں میڈیا کے نمائندوں سے بات چیت کرتے ہوئے ناما ناگیشور راؤ نے کہا کہ اگر سیول کوڈ بل کو پارلیمنٹ میں پیش کیا گیا تو بی آر ایس نہ صرف مخالفت کرے گی بلکہ رکاوٹ پیدا کرے گی۔ کے سی آر کی زیر قیادت نئی دہلی میں احتجاج منظم کیا جائے گا جس کے ذریعہ سماج کو مذہبی بنیادوں پر تقسیم کرنے بی جے پی کی سازش بے نقاب کی جائے گی۔ ناگیشور راؤ نے کہا کہ پارلیمنٹ میں یکساں سیول کوڈ کی مخالفت کیلئے ہم خیال جماعتوں سے تائید حاصل کی جائے گی اور مشترکہ اور متحدہ موقف اختیار کیا جائے گا۔ ناگیشور راؤ نے کہا کہ سماج کو فرقہ وارانہ اساس پر تقسیم کرنے کی ہرگز اجازت نہیں دی جائے گی۔ بی جے پی سے ملک کو نجات دلانے کیلئے بی آر ایس قومی سطح پر جدوجہد کرے گی۔ انہوں نے کہا کہ کھمم میں فرقہ پرست پارٹیوں کیلئے کوئی جگہ نہیں ہے۔ بی جے پی لاکھ کوشش کرلے لیکن کھمم میں عوام اسے قبول نہیں کریں گے۔ انہوں نے کہا کہ یکساں سیول کوڈ کے نفاذ کے نام پر بی جے پی مذہبی بنیادوں پر سماج کو تقسیم کرتے ہوئے فائدہ اٹھانا چاہتی ہے۔ انہوں نے کہا کہ یکساں سیول کوڈ کی تجویز سے حکومت کو فوری دستبرداری اختیار کرنی چاہیئے کیونکہ یہ بل ملک کے مفاد میں نہیں ہے۔ بی آر ایس کے سربراہ کے سی آر نے ملک میں سیکولرازم کی برقراری کیلئے یکساں سیول کوڈ کی مخالفت کا فیصلہ کیا ہے۔ر