نئی دہلی: کسانوں کے معاملہ پر تلنگانہ راشٹرا سمیتی (ٹی آر ایس) کے ارکان پارلیمنٹ کی طرف سے کئے گئے زوردار شور شرابہ کی وجہ سے لوک سبھا کی کارروائی دن بھر کے لئے ملتوی کر دی گئی۔ ملتوی ہونے کے بعد جیسے ہی ایوان کی کارروائی 3بجے شروع ہوئی، ٹی آر ایس کے ارکان پارلیمنٹ نے ہاتھوں میں پلے کارڈ لے کر کسانوں کے معاملے پر نعرے بازی کی۔لوک سبھا کے اسپیکر اوم برلا نے ہنگامہ آرائی کرنے والے ارکان پارلیمنٹ پر زور دیا کہ وہ ایوان میں امن برقرار رکھیں اور اپنی نشستوں پر جائیں۔مسٹر برلا نے کہا، ‘‘تمام ارکان کو ایوان کو مثبت ماحول میں چلانے میں تعاون کرنا چاہیے ۔ میں ہر کسی کو کسی بھی موضوع پر مثبت بحث کے لیے پورا موقع دوں گا۔اس دوران ایوان میں کانگریس لیڈر ادھیر رنجن چودھری نے اپنی بات رکھتے ہوئے کہا کہ ہم بھی چاہتے ہیں کہ ایوان پرامن طریقے سے چلے ۔ ہم ایوان میں پکنک منانے نہیں آتے ہیں بلکہ عوام سے متعلق مسائل اٹھانے آتے ہیں۔ترنمول کانگریس کے کلیان بنرجی نے کہا کہ ایوان میں بحث ہونی چاہئے ۔ کل بھی ہم بہت سے مسائل پر بات کرنا چاہتے تھے ۔ٹی آر ایس کے ارکان اسمبلی کے شور شرابے کے درمیان اوم برلا نے وزارتوں کے کام سے متعلق اہم کاغذات اور پارلیمانی کمیٹیوں کی رپورٹوں کو ایوان کی میز پر رکھا۔کل پارلیمنٹ کے سرمائی اجلاس کا آغاز ہوا اور پہلے ہی دن تینوں متنازعہ زرعی قوانین کی تنسیخ سے متعلق بل بغیر کسی مباحث کے منظور کی گئی جس پر اپوزیشن نے شدید احتجاج کیا۔اپوزیشن کا مطالبہ ہے کہ بل سے دستبرداری اختیار کرنے پر مباحث ہونا چاہئے۔
