پالگھر، یکم مئی، (سیاست ڈاٹ کام) مہاراشٹر کے ضلع پالگھر میں دو سادھوؤں اور ان کے ڈرائیور کی ہجومی تشدد میں قتل کیے جانے کے معاملے میں گرفتار مزید پانچ ملزموں کو جمعہ کے روز 13 مئی تک پولیس حراست میں بھیج دیا گیا۔ ایڈیشنل پبلک پراسیکیوٹر آر بی والبی نے بتایا کہ سی آئی ڈی کرائم برانچ نے اس معاملے میں دو سینیئر شہریوں سمیت پانچ افراد کو گرفتار کیا تھا۔ ان تمام کو 13 مئی تک پولیس حراست میں بھیج دیا گیا ہے ۔ پانچوں ملزم دہانو تعلقہ کے گڈچِنچلے گاؤں کے باشندے ہیں، جہاں دو سادھوؤں سمیت دیگر کو ملزم ہونے کے شبہ میں مار ڈالا گیا تھا۔ قبل ازیں مقامی پولیس نے اس معاملے میں نا بالغوں سمیت 110 افراد کو گرفتار کیا تھا جن میں سے 101 ملزموں کو بھی 13 مئی تک پولیس حراست میں بھیج دیا گیا ہے ۔اس درمیان پالگھر کے سربراہ نے کاسہ تھانہ انچارج سمیت پانچ پولیس اہلکاروں کو لاپرواہی کی پاداش می معطل کر دیا ہے ۔ وہ جائے وقوعہ پر موجود تھے ، جب بھیڑ سادھوؤں اور ان کے ڈرائیور کو زد و کوب کر رہی تھی۔ ساتھ ہی تھانے کے باقی اہلکاروں کا بھی تبادلہ کر دیا گیا ہے ۔پولیس اب گاؤں میں مزید تلاشی مہم چلا رہی ہے اور ملزموں کا سراغ لگانے کے لیے ڈرون کا استعمال بھی کر رہی ہے تاکہ ممکنہ طور پر آس پاس کے جنگل میں چھپے ہوئے ملزم گرفت میں آجائیں۔