کراچی۔29 اکٹوبر (سیاست ڈاٹ کام ) پاکستانی ٹیم کے سابق کپتان اور مایہ نازآل راؤنڈر شاہد آفریدی نے دورہ آسٹریلیا میں ٹسٹ میچوں کے لیے منتخب کی گئی ٹیم کے حوالے سے تحفظات کا اظہار کرتے ہوئے ٹیم کے انتخاب پر تنقید کا نشانہ بنایا۔ گوجرانوالہ کے خانگی کالج میں تقریب سے خطاب کے بعد میڈیا سے گفتگو کرتے ہوئے شاہد آفریدی نے ٹیم کے لیے منتخب فاسٹ بولروں کے سلسلے میں تشویش کا اظہار کیا۔انہوں نے کہا کہ ہمیں دو ٹسٹ میچوں میں 40کھلاڑیوں کو آؤٹ کرنا ہے لیکن ہمارے پاس تجربہ کار بولرز نہیں ہیں۔ انہوں نے اسکواڈ میں شامل فاسٹ بولروں میں عمران خان جونیئر اور محمد عباس کا حوالہ دیتے ہوئے کہا کہ ہمارے پاس انگلش حالات والے فاسٹ بولرز ہیں لیکن تیز گیند کرنے والے بولرز نہیں ہیں جن کی ہمیں آسٹریلیا میں ضرورت ہو گی۔ ایسا لگتا ہے کہ شاہد آفریدی نے پورے اسکواڈ کا صحیح سے جائزہ نہیں لیا کیونکہ ان کی یہ بات تو درست ہے کہ ہماری بولنگ ناتجربہ کار ہے لیکن ٹیم میں شامل نوجوان فاسٹ بولرز نسیم شاہ اور موسیٰ خان دونوں ہی 90میل فی گھنٹہ کی رفتار سے گیند کرنے کی صلاحیت رکھتے ہیں۔ سابق کپتان نے کہا کہ نئے کھلاڑیوں کو موقع دینا اچھی بات ہے لیکن ہم آسٹریلیا محض رسمی کارروائی پوری کرنے یا نوجوانوں کو موقع دینے کے لیے تو نہیں جا رہے، ہم غیرملکی دوروں پر جیتنے کے لیے جاتے ہیں۔ شاہد آفریدی نے کہا کہ دورے کے دوران بابر اعظم پر بہت دباؤ ہو گا اور اللہ کرے کو وہ اپنی کارکردگی کا سلسلہ جاری رکھیں۔ پاکستان اور آسٹریلیا کے درمیان ٹی20 سیریز کا پہلا میچ تین نومبر کو سڈنی میں کھیلا جائے گا جس کے بعد دو ٹسٹ میچوں کی سیریز کھیلی جائے گی۔
