l افغانستان کو نائب صدر امراللہ صالح جیسے دغابازوں کی ضرورت نہیں
l وقت آنے پر آپ لوگ ہی سب سے پہلے ملک سے بھاگیں گے : فواد چودھری
اسلام آباد ؍ کابل : پاکستان اور افغانستان کے درمیان سوشل میڈیا پر نوک جھونک تیز ہوگئی ہے۔ افغان نائب صدر کے ایک متنازعہ ٹوئٹ کے جواب میں پہلے پاکستان کے وفاقی وزیر اطلاعات و نشریات نے اور پھر قومی سلامتی مشیر ڈاکٹر معید یوسف نے ٹوئٹ کیا۔پاکستان کے قومی سلامتی مشیر ڈاکٹر معید یوسف نے افغانستان کے نائب صدر امراللہ صالح کے ایک ٹوئٹ کے جواب میں جمعرات کے روز ٹوئٹ کرکے کہا ہے کہ افغانستان کے اعلیٰ عہدیداروں کے ‘احمقانہ بیانات‘ سے خود افغانستان کی بے عزتی ہو رہی ہے اور یہ عہدیدار جان بوجھ کر پاکستان کے ساتھ دو طرفہ تعلقات کو نقصان پہنچا رہے ہیں۔معید یوسف نے ایک سے زائد ٹوئٹ کرتے ہوئے کہا،’’افغانستان کو روزانہ اس طرح کے احمقانہ بیانات سے شرمندہ کیا جا رہا ہے، افغانوں کو یقین ہونا چاہیے کہ ہر کوئی ان غیر سنجیدہ عناصر کے مذموم ایجنڈہ کو دیکھ سکتا ہے۔”انہوں نے ایک دیگر ٹوئٹ میں کہا،’’چند بگاڑ پیدا کرنے والے عناصر جو بدقسمتی سے ہمارے افغان بہن بھائیوں پر بطور اعلیٰ عہدیدار کے مسلط ہیں، کی جانب سے تلخ اور غلط بیان بازی،مسلسل دوطرفہ تعلقات کی خرابی کی وجہ بن رہے ہیں جس کا مقصد اپنی ناکامیوں سے توجہ ہٹانا ہے۔”پاکستان کے قومی سلامتی مشیر کا کہنا تھا کہ اسلام آباد، افغانستان میں امن و استحکام کے لیے پاکستان کے تعاون پر شرپسند عناصر کے اثرات پڑنے کی اجازت نہیں دے گا۔ انہوں نے کہا،”پاکستان افغانستان میں جامع سیاسی حل کی خاطر سہولت کاری جاری رکھنے کے لیے بدستور پرعزم ہے۔ اسی حوالے سے وزیراعظم عمران خان نے حال ہی میں صدر اشرف غنی سے ملاقات پر اتفاق کیا تھا۔”سوشل میڈیا پر دونوں ملکوں کے اعلی حکام کے درمیان تکرار کا حالیہ سلسلہ افغانستان کے نائب صدر امراللہ صالح کے ایک ٹوئٹ اور اس کے ساتھ منسلک تصویر سے شروع ہوا۔افغان نائب صدر امر اللہ صالح نے چہارشنبہ کو ایک ٹوئٹ کی تھی جس میں منگل کے روز نماز عید کے دوران افغان صدارتی محل کے قریب ہوئے راکٹ حملوں کا تذکرہ کیا گیا تھا۔ انہوں نے اپنی ٹوئٹ کے ساتھ سقوط ڈھاکہ پر پاکستانی جنرل امیر عبداللہ خان نیازی کی جانب سے ہندوستانی جنرل کے سامنے سرینڈر دستاویزات پر دستخط کرتے ہوئے تصویر بھی پوسٹ کی تھی۔افغان نائب صدر نے اپنی ٹوئٹ میں کہا تھا،’’ہماری تاریخ میں ایسی کوئی تصویر نہیں ہے اور نہ ہی ہو گی۔ ہاں میں منگل کو راکٹ حملے کے دوران کچھ دیر کے لیے گھبرا گیا تھا۔ لہٰذا پاک ٹوئٹر اٹیکرز اس تصویر کا غم ہلکا کرنے کے لیے دہشت گردی اور طالبان کی مدد حاصل کرنے کے بجائے کوئی اور راستہ تلاش کریں۔”پاکستانی فوج پر افغان نائب صدر کے اس بالواسطہ تنقید پر سب سے پہلے وفاقی وزیر اطلاعات و نشریات فواد چودھری نے جوابی ٹوئٹ کیا۔فواد چودھری کا کہنا تھا کہ افغانستان آپ (امراللہ صالح) جیسے دغا بازوں کا نہیں بلکہ بہادر افغانوں کا ہے۔ انہوں نے مزید لکھا،’’آپ جیسے بزدلوں کو افغانستان اور خطے میں امن سے کوئی دلچسپی نہیں، وقت آنے پر آپ لوگ سب سے پہلے ملک سے بھاگیں گے۔