ایمسٹل وین ۔29 اکٹوبر (سیاست ڈاٹ کام ) نیدرلینڈز کی ٹیم نے پاکستان کو دوسرے ہاکی ٹسٹ میں یکطرفہ مقابلے کے بعد 1-6 سے شکست دے دی جس کے ساتھ ہی پاکستانی ٹیم متواتر دوسری مرتبہ اولمپکس کی دوڑ سے باہر ہو گئی۔ دونوں ٹیموں کا پہلا ٹسٹ میچ 2-2 سے برابر ہونے کے بعد شائقین کو امید تھی کہ انہیں دوسرے میچ میں بھی اچھی ہاکی دیکھنے کو ملے گی لیکن نیدرلینڈز کی ٹیم نے پاکستانی ٹیم کو پورے میچ میں بے بس کردیا۔ ایمسٹل وین میں کھیلے گئے میچ کے 9ویں ہی منٹ میں نیدرلینڈز کے بیجورن کیلرمین نے اپنی ٹیم کا کھاتا کھولا جسے 17ویں منٹ میں وین ڈر وردن منک نے گول کر کے دگنا کردیا۔ 5 منٹ بعد کیلرمین نے اپنا دوسرا اور ٹیم کا تیسرا گول اسکور کیا جبکہ 29 ویں منٹ میں وردن منک نے بھی اپنا دوسراگول اسکور کر لیا۔ مخالف ٹیم کی جانب سے گول پوسٹ پر کیے جا رہے تابڑ توڑ حملوں سے حواس باختہ پاکستانی ٹیم حریف پر گول کرنے کی تمام تر تدبیریں بھول گئی اور 39ویں منٹ میں پیٹر ٹیرنس نے پانچواںگول اسکورکردیا۔ میچ کے تیسرے کوارٹر کے اختتام سے قبل نیدرلینڈز کی ٹیم نے چھٹا گول بناکر پاکستانی ٹیم کو بے حال کردیا۔ آخری کوارٹر میں میزبان ٹیم کوئی گول اسکور نہ کر سکی اور میچ کے اختتام سے چند منٹ قبل رضوان علی پاکستان کی جانب سے میچ کا واحد گول اسکورکر کے کچھ لاج رکھ لی۔ پاکستان کوناصرف میچ میں 1-6 کی بدترین شکست کا سامنا کرنا پڑا بلکہ اس کے ساتھ ہی پاکستان کا کے قومی کھیل کی ٹیم لگاتار دوسری مرتبہ اولمپکس کے کوالیفائی کرنے میں ناکام رہی اور ایونٹ کی دوڑ سے باہر ہو گئی۔
