کراچی ۔28 اکٹوبر (سیاست ڈاٹ کام ) پاکستان میں 10سال کے طویل عرصے کے بعد ٹسٹ کرکٹ کی بحالی کی امیدیں مزید روشن ہو گئی ہیں اور پاکستان کرکٹ بورڈ(پی سی بی) نے سری لنکا کے خلاف دو ٹسٹ کی سیریز کے میچز کراچی اور راولپنڈی میں کرانے کی تجویز پیش کی ہے۔ 2009 میں لاہور میں سری لنکائی ٹیم پر دہشت گرد حملوں کے بعد پاکستان میں یہ پہلی ٹسٹ سیریز ہوسکتی ہے۔ حال ہی میں محدود اوورز کی سیریز کے لیے پاکستان آنے والی سری لنکائی ٹیم کے کامیاب دورے کے بعد پاکستان میں ٹسٹ سیریز کے انعقاد کے امکانات مزید روشن ہو گئے ہیں۔ محدود اوورز کی سیریز کے لیے 10 اہم اور سینئر کھلاڑیوں نے پاکستان آنے سے انکارکردیا تھا جس کے بعد نوجوان اور قدرے ناتجربہ کار ٹیم کو پاکستان آئی تھی۔ تاہم کامیاب دورے کے بعد مذکورہ کھلاڑیوں نے پاکستان میں سیکیورٹی اور ماحول کو کھیل کے لیے شاندار قرار دیتے ہوئے کہا کہ وہ اپنے سینئر کھلاڑیوں کو پاکستان آنے کے لیے راضی کرنے کی کوشش کریں گے۔ پی سی بی نے پاکستان اور سری لنکا کے درمیان سیریز کا پہلا ٹسٹ میچ کراچی اور لاہور کے بجائے راولپنڈی میں کروانے کی تجویز پیش کی ہے جہاں راولپنڈی میں آخری مربتہ 2004 میں پاکستان اور ہندوستان کے درمیان میچ ہوا تھا۔ سیریز کا دوسرا ٹسٹ میچ کراچی میں منعقد کرنے کی تجویز دی گئی ہے جس نے پاکستان میں 2009 میں کھیلے گئے آخری ٹسٹ میچ کی میزبانی کی تھی۔ ٹسٹ سیریز کے لیے لاہور کو نظراندازکردیا گیا جس کی وجہ صوبے بھر میں کہر اور ٹسٹ میچ کے لیے دن کے کم اوقات و روشنی کے مسائل ہیں۔
