راولپنڈی۔11 ڈسمبر (سیاست ڈاٹ کام) پاکستان اور سری لنکا کے درمیان ٹسٹ میچ کے پہلے روز کھیل کے اختتام پر سری لنکا ٹیم نے 5 وکٹ کے نقصان پر 202 رنز بنائے ہیں۔ پاکستان اورسری لنکا کے درمیان 2 ٹسٹ میچوں کی سیریز کا پہلا میچ راولپنڈی کرکٹ اسٹیڈیم میں کھیلا جارہا ہے جس کے ساتھ ہی پاکستان میں10 سال بعد ٹسٹ کرکٹ بحال ہوگئی ہے اورراولپنڈی کے ویران میدان 15 برس بعد پھر سے آباد ہوگئے ہیں۔ اس تاریخی موقع پر پی سی بی نے کھلاڑیوں کے لیے یادگار ٹوپیاں تقسیم کیں جبکہ سیکیورٹی کے سخت انتظامات ہیں۔ سری لنکا نے پاکستان کیخلاف ٹاس جیت کر بیٹنگ کا فیصلہ کیا۔ کپتان کرونا رتنے محتاط انداز میں کھیلتے ہوئے نصف سنچری مکمل کرنے میں کامیاب رہے۔ ایک موقع پر عثمان شنواری نے کرونا رتنے کو 31 رنزپربولڈکیا لیکن بیلز نہ گریں جس کے نتیجے میں انہیںموقع مل گیا۔کھانے کے وقفے کے بعد سری لنکا کی پہلی وکٹ96رنز پرگری اورکرونا رتنے 59 رنز بنا کر شاہین شاہ آفریدی کی گیند پر ایل بی ڈبلیو ہوگئے۔ دوسری وکٹ 109 رنز پرگری اوراوشاڈا فرنانڈو40 رنزبناکر نسیم شاہ کا شکار بنے۔ مینڈس صرف10 رنز ہی بناسکے اور عثمان شنواری کی گیند پر محمد رضوان کوکیچ دے بیٹھے۔مہمان ٹیم کا چوتھا کھلاڑی 127 رنز پر اؤٹ ہوا اورچندیمل صرف 2 رنز بناکرمحمد عباس کی گیند پر بولڈ ہوئے۔آئی لینڈرزکی پانچویں وکٹ 189 رنز پرگرگئی اور اینجلو میتھیوز31 رنز بناکر نسیم شاہ کی گیند پر پویلین واپس لوٹ گئے۔خراب روشنی کے باعث میچ کے پہلے روزکاکھیل قبل از وقت ختم ہوگیا اور سری لنکا نے پانچ وکٹوں پر 202 رنز بنا لیے ہیں۔اس میچ میں اتفاق کی بات یہ ہے کہ پاکستان کے تمام 11 کھلاڑی سری لنکاکیخلاف ہوم گراؤنڈ پر پہلا ٹیسٹ کھیل رہے ہیں۔
