اسلام آباد: پاکستان میں نگراں حکومت نے پٹرولیم مصنوعات کی قیمتوں میں بڑا اضافہ کردیا ہے۔ پٹرول کی فی لیٹر قیمت 14 روپے 91 پیسے جبکہ ہائی اسپیڈ ڈیزل کی فی لیٹر قیمت 18 روپے 44 پیسے بڑھا دی گئی ہے۔اس طرح پاکستان کی تاریخ میں پہلی بار پٹرول اور ڈیزل کی قیمت 300 روپے فی لیٹر سے زیادہ ہو گئی ہے۔وزارت خزانہ کی جانب سے جمعرات اور جمعہ کی درمیانی رات جاری کیے گئے نوٹیفیکیشن کے مطابق ’اضافے کے بعد پٹرول کی فی لیٹر قیمت 290 روپے 45 پیسے سے بڑھ کر 305 روپے 36 پیسے ہو گئی ہے۔‘اسی طرح ہائی اسپیڈ ڈیزل کی فی لیٹر نئی قیمت 311 روپے 84 پیسے تک جا پہنچی ہے جبکہ اس سے قبل فی لیٹر ہائی اسپیڈ ڈیزل کی قیمت 293 روپے 40 پیسے تھی۔وزارت خزانہ کے مطابق ’بین الاقوامی مارکیٹ میں پٹرولیم مصنوعات کی قیمتوں میں اضافے اور کرنسی کی قدر میں ردوبدل کی وجہ سے حکومت نے پٹرول اور ہائی اسپیڈ ڈیزل کی قیمت میں اضافہ کیا ہے۔‘
