راولپنڈی۔10 ڈسمبر (سیاست ڈاٹ کام ) پاکستان میں 10سال بعد ٹسٹ کرکٹ کی واپسی ہورہی ہے جیسا کہ کل یہاں میزبان پاکستان اور سری لنکا کے درمیان دو ٹست مقابلوں کی سیریز کا پہلا مقابلہ شروع ہورہا ہے ۔ پاک سری لنکا سیریز کی ٹرافی کی تقریب رونمائی کر دی گئی۔ اس موقع پر پاکستانی کرکٹ ٹیم کے کپتان اظہر علی نے کہا ہے سارے کھلاڑی پرجوش ہیں، بہتر کھیل پیش کریں گے۔ راولپنڈی میں مشترکہ پریس کانفرنس سے پاکستانی اور سری لنکن کپتانوں نے خطاب کیا۔ اظہرعلی نے کہا کہ سری لنکا کیخلاف کامیابی کیلئے منظم ہوکرکھیلنا ہو گا، سری لنکا ہمیشہ ڈسپلن بیٹنگ اور بولنگ کرتی ہے۔ ہمیں ہوم گراؤنڈ پر کھیلنے کا فائدہ ہو گا، 11 پلئیرز کا پچ دیکھ کر فیصلہ کریں گے۔ انہوں نے کہا کہ آسٹریلیا میں کی گئی خامیوں پرقابو پانے کی کوشش کریں گے۔ کپتان کیلئے خود مظاہرہ کرنا بہت ضروری ہوتا ہے، کوشش ہے زیادہ سے زیادہ اسکورکروں۔ بطور کپتان ذہنی دباؤ کا سامنا کرنے کیلئے ہمیشہ تیار رہنا چاہیے۔ سیریز میں بہترکھیل پیش کریں گے اور کوشش ہوگی زیادہ اسکور کریں۔ سری لنکائی کپتان کرونا رتنے نے کہا ہے کہ ماضی میں پاکستان کے خلاف اچھی کارکردگی رہی، اس سے ہمارا اعتماد بڑھے گا۔ پاکستانی ٹسٹ ٹیم کے ہر کھلاڑی کیلئے علیحدہ منصوبہ بنا رکھا ہے، کوشش ہو گی پاکستانی ٹیم کے خلاف منصوبہ کے مطابق کھیلیں اور اچھی کارکردگی سے میچ جیتیں۔ رتنے نے مزید کہا کہ مکی آرتھر پاکستانی ٹیم کے کوچ رہ چکے ہیں، ہر کھلاڑی کی صلاحیت سے واقف ہیں، پاکستان کے پاس اچھا بولنگ شعبہ ہے۔ ٹسٹ کرکٹ 5 روز کا کھیل ہے ہر روز اچھا کھیلنا ہوتا ہے۔
