واشنگٹن: وزیرخزانہ نے آئی ایم ایف کے آگے گھٹنے ٹیک دیے‘ پٹرول مہنگا کرنے کی شرط تسلیم ۔ تفصیلات کے مطابق پاکستان نے آئی ایم ایف سے مذاکرات میں پیٹرولیم مصنوعات پر زرتلافی ختم کرنے پر اتفاق کرتے ہوئے قیمتوں میں اضافے کا اشارہ دے دیا۔ وزیر خزانہ مفتاح اسماعیل کی واشنگٹن میں آئی ایم ایف کے ایگزیکٹو بورڈ کے ساتھ ملاقات ہوئی جس میں پاکستان کے لیے بیل آٹ پیکیج کے ساتویں جائزے پر بات چیت کی گئی۔ آئی ایم ایف حکام نے پاکستان پر پیٹرول مصنوعات پر سبسڈیز ختم کرنے کیلئے زور دیا ۔ وزیر خزانہ مفتاح اسماعیل نے بھی آئی ایم ایف سے ان سبسڈیز کو ختم کرنے پر اتفاق کیا ۔ بعدازاں واشنگٹن ڈی سی میں معروف امریکی تھینک ٹینک اٹلانٹک کونسل کے زیر اہتمام تقریب سے خطاب کرتے ہوئی مفتاح اسماعیل نے بتایا کہ آئی ایم ایف حکام نے پیٹرول پر سبسڈیز نہ دینے پر زور دیا ہے۔ وزیر خزانہ نے کہا کہ ہم نے بھی آئی ایم ایف سے ان سبسڈیز میں کمی پر اتفاق کیا ہے کہ حکومت ان سبسڈیز کی متحمل نہیں ہو سکتی۔
