نئی دہلی : پاکستان کے حشام ہادی خان نے ایشیا کپ یوتھ اسکریبل چمپئن شپ جیت لی۔ نئی دہلی میں منعقدہ یوتھ اسکریبل چیمپئن شپ میں پاکستان کے حشام ہادی خان ایک مرتبہ پھر ایشین چمپئن بن گئے۔ حشام نے ٹائٹل کا کامیابی سے دفاع کرتے ہوئے فائنل میں ہندوستان کے مادھو گوپال کماتھ کو شکست دی۔ 3 روزہ ایونٹ کے فائنل راؤنڈ میں پہنچنے والے حشام نے کھیل کے دوسرے دن سے ہی لیڈ حاصل کرلی تھی ان کا دو دن کا اسکور 1420 تھا۔ ٹیم چمپئن شپ میں پاکستان کے مونس خان نے ملائیشیائی پلیئر کے خلاف ہائی ایسٹ انفرادی اسکور 760 بھی بنایا۔ ایشین چمپئن شپ میں 11 ممالک کے 60 پلیئرز کے درمیان مقابلہ تھا۔ ٹاپ 10 میں پاکستان کے 6 پلیئرز رہے۔ چمپئن حشام پہلے ، مادھو گوپال دوسرے اور عفان سلمان تیسرے نمبر پر رہے۔ اس کے علاوہ مونس نے انڈر 16 اور احمد سلمان نے انڈر 12 کا ٹائٹل اپنے نام کیا۔
