ہرارے: پاکستان نے زمبابوے کو تین میچوں کی ٹی ٹوئنٹی سیریز کے آج آخری اور فیصلہ کن میچ میں 24 رنز سے شکست دے کر سیریز 1۔2 سے جیت لی۔ سیریز کے یہاں منعقدہ فیصلہ کن میچ میں پاکستان کے کپتان بابراعظم نے ٹاس جیت کر میزبانوں کے خلاف پہلے بیٹنگ کرنے کا فیصلہ کیا اور محتاط انداز میں بیٹنگ کا آغاز کیا۔ پاکستان نے مقررہ اوورز میں 163/3 اسکور کئے جس میں محمد رضوان نے سب سے زیادہ 91 رنز (ناٹ آؤٹ) بنائے۔ محمد رضوان اور شرجیل خان نے اننگز کا آغاز کیا ، مگر سیریز میں پہلی دفعہ موقع حاصل کرنے والے شرجیل خان بڑی اننگز کھیلنے میں ناکام ہوئے اور پانچویں اوور میں 35 رنز کے اسکور پر 18 رنز بنا کر آؤٹ ہوئے۔ کپتان بابر اور رضوان نے طویل شراکت قائم کی اورآخری اوور میں ٹیم کا اسکور 161 رنز تک پہنچایا، اس دوران دونوں نے اپنی نصف سنچریاں بھی مکمل کیں۔ پاکستان کی بقیہ دونوں وکٹیں 19ویں اوور میں گریں جب تیسری گیند پر کپتان بابر 52
رنز بنا کر کیچ آوٹ ہوئے اور ان کے بعد کریز پر آنے والے فخر زماں بھی اگلی ہی گیند پر بغیر کوئی رن بنائے وکٹ گنوا بیٹھے۔ رضوان نے 60 گیندوں میں 5 چوکوں اور 3 چھکوں کی مدد سے 91 رنز پر ناٹ آؤٹ رہے۔ زمبابوے کی جانب سے لیوک جونگے نے تینوں وکٹیں حاصل کئے۔ 166 کے ٹارگٹ کے تعاقب میں زمبابوے کے اوپنرز نے بھی 5 اوورز میں 37 رنز کی شراکت بنائی۔ تاہم حسن علی نے مساکانڈا کی اننگز 10 رنز پر ختم کردی۔ اوپنر ویسلے میدھیویر نے اپنی نصف سنچری بھی مکمل کی اور تادیواناشے مارومانی کے ساتھ دوسری وکٹ کی رفاقت میں ٹیم کی سنچری بھی بنائی۔ مارومانی 35 رنز بنا کر محمد حسنین کی وکٹ بن گئے۔ ان کی اننگز میں 4 چوکے شامل تھے۔ ویسلے کی اننگز 59 رنز پر حسن علی ختم کردی اس وقت زمبابوے کا اسکور 16 ویں اوور میں 109 رنز تھا، جس کے بعد تجربہ کار برینڈن ٹیلر نے 20 رنز بنا کر تھوڑی مزاحمت ضرور کی لیکن دیگر بیٹسمین دوہرے ہندسے کو بھی عبور نہیں کر پائے۔ حسن علی نے شاندار بولنگ کرتے ہوئے میزبان ٹیم پر شدید دباؤ ڈالا۔ زمبابوے کی ٹیم مقررہ اوور میں 7 وکٹوں پر 141 رنز بناسکی اور 24 رنز کے فرق سے میچ کے ساتھ ساتھ سیریز بھی ہار گئی۔ حسن علی نے سب سے زیادہ 4، حارث رؤف نے 2 اور حسنین نے ایک وکٹ حاصل کی۔ حسن علی کومیچ کا بہترین کھلاڑی قرار دیا گیا جبکہ رضوان کو سیریز کے بہترین کھلاڑی کا ایوارڈ دیا گیا۔
فیصلہ کن میچ کیلئے پاکستانی ٹیم میں شرجیل خان، سرفراز احمد اور حسن علی کو موقع دیا گیا تھا۔
