ہرارے ۔ زمبابوے اور پاکستان کے درمیان ہرارے میں کھیلے گئے ٹی 20 سیریز کے پہلے میچ میں پاکستان نے زمبابوے کو 11 رنز سے شکست دے کر تین میچوں کی سیریز میں 1-0 کی برتری حاصل کر لی۔150 رنز کے تعاقب میں زمبابوے کی ٹیم مقررہ 20 اوورز میں 7 وکٹوں کے نقصان پر 138 رنز ہی بنا سکی۔زمبابوے کی جانب سے تناشے کمن ہکاموے اور ویسلی مادھویرے نے اننگز کا آغاز کیا لیکن ویسلی 14 رنز بنا کر محمد حسنین کا شکار بنے۔اس سے اگلی ہی گیند پر محمد حسنین نے تدی وانشے مرومانی کو بھی کیچ آؤٹ کر دیا۔س کے بعد تناشے کمن ہکاموے اور کریگ ارون نے اننگز کو آگے بڑھایا۔ دونوں کے درمیان 56 رنز کی شراکت داری بنی لیکن اس کے بعد پاکستانی اسپنرز نے میچ کا پانسہ پلٹ دیا۔ تناشے کمن ہکاموے 29 رنز بنا کر محمد حفیظ کی گیند پر اسٹمپ آؤٹ ہوئے۔ اس کے بعد کریگ ارون بھی عثمان قادر کی گیند پر 34 رنز بنا کر کیچ آؤٹ ہوئے۔زمبابوے کے مڈل آرڈر بیٹسمین عثمان قادر کی اسپن بولنگ کے آگے بے بس نظر آئے۔ شان ولیمز نو اور ریگس چکابوا تین رنز بنا کر آؤٹ ہوئے۔زمبابوے کے ساتویں آؤٹ ہونے والے بیٹسمین ریان برل تھے۔ وہ14 رنز بنا کر حارث رؤف کی گیند پر بولڈ ہوئے۔لیوک جونگوے 30 اور ویلنگٹن مساکاڈزا دو رنز کے ساتھ ناٹ آؤٹ رہے۔پاکستان کی طرف سے عثمان قادر نے تین اور محمد حسنین نے دوکھلاڑیوں کو آؤٹ کیا۔ محمد رضوان کو شاندار بیٹنگ پر مین آف دی میچ کا ایوارڈ ملا۔قبل ازیں پاکستان نے 20 اوورز میں سات وکٹوں کے نقصان پر149 رنز بنائے۔ محمد رضوان نے 82 رنز ناٹ آؤٹ کی شاندار اننگز کھیلی۔پاکستان کی طرف سے محمد رضوان اور بابر اعظم نے اننگز کا آغازکیا لیکن بابر اعظم ابھی سنبھل بھی نہ پائے تھے وہ دو رنز بنا کر بلیسنگ مزربانی کی گیند پر کیچ آؤٹ ہوئے۔فخر زمان بھی زیادہ دیر وکٹ پر نہ ٹھہر سکے اور13 رنز بنانے کے بعد ویسلی کی گیند پر بولڈ ہو گئے۔ محمد حفیظ بھی صرف پانچ رنز بنانے کے بعد ویسلی کا شکار بنے۔دانش عزیز بھی کچھ خاص کارکردگی نہ دکھا سکے اور وہ 15 رنز پر لیوک جونگوے کی گیند پر وکٹ گنوا بیٹھے۔یاد رہے کہ پاکستانی ٹیم دورہ جنوبی افریقہ میں ونڈے اور ٹی 20 سیریز اپنے نام کرنے کے بعدیہاں پہنچی ہے ۔
