کراچی ۔3 اکٹوبر (سیاست ڈاٹ کام ) پاکستان نے سری لنکا کے خلاف تیسرے میچ میں 5 وکٹوں سے کامیابی حاصل کرتے ہوئے تین میچوں کی سیریز 0-2 سے جیت لی۔سری لنکا نے دھنشکا گونا تھیلاکا کی شاندار سنچری کی بدولت پاکستان کو سیریز کے تیسرے اور آخری ونڈے میں کامیابی کے لیے 298 رنز کا ہدف دیا تھا جس کو پاکستان نے بیٹسمینوں کی ذمہ دارانہ کارکردگی کے بدولت49 ویں اوور میں حاصل کرلیا۔ نیشنل اسٹیڈیم کراچی میں کھیلے گئے سیریز کے تیسرے ونڈے میچ میں سری لنکا نے ٹاس جیت کر پہلے خود بیٹنگ کا فیصلہ کیا تھا جس کے بعد 13 کے مجموعے پر آوشکا فرنانڈو صرف چار رنز بنا کر محمد عامر کی وکٹ بنے۔ اس موقع پر گوناتھیلاکا کا ساتھ دینے کپتان لہیرو تھریمانے آئے اور دونوں کھلاڑیوں نے عمدہ کھیل پیش کرتے ہوئے اپنی ٹیم کی سنچری مکمل کرائی۔88 رنز کی اس شراکت کے خاتمے لیے کپتان سرفراز احمد اسپنر محمد نواز کو بولنگ پر لائے اور انہوں نے کپتان کے اعتماد پر پورا اترتے ہوئے اپنے پہلے ہی اوور میں سری لنکن کپتان کی وکٹ حاصل کر لی، تھریمانے نے 36رنز کی اننگز کھیلی۔دوسرے سرے سے گوناتھیلاکا نے عمدہ کھیل جاری رکھا اور اپنی نصف سنچری مکمل کرنے کے ساتھ ساتھ اینجلو پریرا کے ساتھ مزید 50رنز کی ساجھے داری قائم کی، پریرا 13 رنز ہی بنا سکے۔ تین وکٹیں گرنے کے بعد گونا تھیلاکا کا ساتھ دینے منود بھنوکا آئے اور دونوں کھلاڑیوں نے 74رنز کی شراکت قائم کر کے اپنی ٹیم کے بڑے اسکور کی راہ ہموار کی جبکہ اس دوران اوپنر نے اپنی سنچری بھی مکمل کر لی۔اس شراکت کا خاتمہ اس وقت ہوا جب وکٹوں کے درمیان غلط فہمی کے نتیجے میں بھنوکا کی 36 رنز کی اننگز اختتام کو پہنچی جبکہ شیہان جے سوریا بھی صرف تین رنز بنا سکے۔ 243 کے مجموعی اسکور پر گوناتھیلاکیریئر کی بہترین 133 رنز کی اننگز کھیلنے کے بعد محمد عامر کی دوسری وکٹ بن گئے، ان کی اننگز میں 16 چوکے اور ایک چھکا شامل رہا۔اختتامی اوورز میں داسن شناکا نے جارحانہ بیٹنگ کی جس کی بدولت سری لنکا کی ٹیم مقررہ اوورز میں 9 وکٹوں کے نقصان پر 297 رنز بنانے میں کامیاب رہی۔شناکا اننگز کی آخری گیند پر وہاب ریاض کی وکٹ بن گئے تاہم آؤٹ ہونے سے قبل 24 گیندوں پر 2 چھکوں اور تین چوکوں کی مدد سے 43 رنز بنا چکے تھے۔ پاکستان کی جانب سے محمد عامر تین وکٹیں لے کر سب سے کامیاب بولر رہے جبکہ وہاب ریاض کو 2 وکٹوں کے لئے 81 رنز کی پٹائی برداشت کرنی پڑی۔نشانہ کے تعاقب کیلئے سیریز میں اپنا پہلا میچ کھیلنے والے عابد علی نے فخر زمان کے ساتھ بہترین آغازکیا اور دونوں اوپنرز نے 123 رنز کی شاندار شراکت قائم کرکے ٹیم کی کامیابی کی بنیاد رکھی۔ عابد علی 74 رنز بنا کر آوٹ ہوئے جس کے بعد بابر اعظم بھی صرف 31 رنز بنا سکے جبکہ فخر زمان نے 91 گیندوں پر 76 رنز کی ایک سست اننگز کھیلی، کپتان سرفراز بھی صرف 23 رنز بنا سکے۔حارث سہیل نے ذمہ دارانہ انداز میں کھیلتے ہوئے 50 گیندوں پر 56 رنز بنائے اور ٹیم کو جیت کے قریب لاکھڑا کیا جس کو افتخار احمد نے 3 چوکوں اور ایک چھکے کی مدد سے حاصل کرلیا۔پاکستان نے 49 ویں اوور کی دوسری گیند پر 299 رنز بنا کر میچ کے ساتھ سیریز بھی اپنے نام کر لی۔افتخار احمد 28 اور وہاب ریاض ایک رن بنا کر ناقابل شکست رہے۔عابد علی کو میچ کا بہترین کھلاڑی قرار دیا گیا۔
