کولمبو۔11 ستمبر (سیاست ڈاٹ کام ) سری لنکائی ٹیم کے رواں ماہ دورہ پاکستان کی راہ میں مشکلات حائل ہونے لگی ہیں اور 10 سری لنکائی کرکٹرز نے دورے پر پاکستان جانے سے انکار کردیا ہے۔سری لنکا نے تین ونڈے اور تین ٹی20 میچوں کی سیریز کے لیے رواں ماہ پاکستان کا دورہ کرنا ہے لیکن اب یہ دورہ برف دان کی نذرہوتا دیکھائی دے رہا ہے۔دونوں ملکوں کے کرکٹ بورڈ نے ونڈے اور ٹی20 سیریزکراچی اور لاہور میں کھیلنے پر اتفاق کیا تھا جس کے لیے سری لنکائی ٹیم کو 26ستمبر کو پاکستان پہنچنا تھا لیکن اب اس کی راہ میں مشکلات حائل ہو گئی ہیں۔سری لنکن بورڈ نے پاکستان کرکٹ بورڈ(پی سی بی) کو گرین سگنل دینے کے بعد اپنے کھلاڑیوں سے بات چیت کی لیکن کھلاڑیوں کی جانب سے اسے شدید ردعمل کا سامنا کرنا پڑا جو پاکستان جانے پر راضی نہیں۔سری لنکن کرکٹ بورڈ دورہ پاکستان کیلئے سنیئر کھلاڑیوںکو رضامند نہیں کرسکا اور ونڈے ٹیم کے کپتان دمتھ کرونارتنے اور ٹی20 قائد لستھ ملنگا سمیت 10 اہم کھلاڑیوں نے پاکستان جا کر کھیلنے سے معذرت کرلی۔ دورہ پاکستان کے سلسلے میں سری لنکن کرکٹ بورڈ انتظامیہ کی کھلاڑیوں سے ملاقات اور انہیں پاکستان میں سیکیورٹی سے آگاہ کیا گیا۔ سری لنکن کرکٹ بورڈ نے کھلاڑیوں سے پاکستان جانے سے متعلق رائے مانگی لیکن 10 کھلاڑیوں نے دورہ پاکستان سے انکارکردیا۔ جن کھلاڑیوں نے پاکستان جانے سے انکارکیا ان میں ونڈے ٹیم کے کپتان دمتھ کرونارتنے اور ٹی20 قائد ملنگا کے ساتھ ساتھ تجربہ کار اینجلو میتھیوز، دنیش چندیمل، تھسارا پریرا، کوشل پریرا نروشن ڈکویلا، دھننجیا ڈی سلوا، اکیلا دھننجیا اور سورنگا لکمل شامل ہیں۔ کوشل مینڈس زخمی ہونے کے باعث دورہ پاکستان کے لیے دستیاب نہیں ہے جس کے سبب بورڈ کی مشکلات مزید بڑھ گئی ہیں کیونکہ سینئر اور اہم کھلاڑیوں کی جانب سے انکار کے بعد حکام کے لیے ٹیم کی تشکیل ایک بڑا مرحلہ ہے۔ سری لنکن بورڈ نے کہا ہے کہ دورہ پاکستان کے حوالے سے کھلاڑی فیصلہ کرنے میں آزاد ہیں۔ یاد رہے کہ سری لنکن ٹیم کے دورہ پاکستان کے موقع پر گزشتہ مرتبہ بھی کئی سینئر اور اہم سری لنکن کھلاڑیوں نے پاکستان کے دورے سے انکار کردیا تھا اور اس موقع پر ٹیم کی قیادت تھسارا پریرا نے کی تھی لیکن اس مرتبہ وہ بھی پاکستان جانے سے انکار کر چکے ہیں۔
