کراچی ۔4 اکٹوبر (سیاست ڈاٹ کام) سری لنکائی کپتان لہیرو تھریمنے نے دورہ پاکستان کو یادگار قرار دیتے ہوئے کہا ہے کہ وہ دوسروں ٹیموں کو بھی پاکستان آنے کا مشورہ دیں گے۔ پاکستان نے کراچی میں کھیلے گئے سیریز کے تیسرے میچ میں سری لنکا کو 5 وکٹوں سے شکست دے کر تین میچوں کی سیریز 0-2 سے اپنے نام کر لی تھی۔سری لنکا کے کپتان لہیرو تھر یمنے نے سیریزکے اختتام پر گفتگو کرتے ہوئے کہا کہ مجھے اپنی ٹیم پر فخر ہے کیونکہ انہوں نے بہت اچھی کرکٹ کھیلی کی۔انہوں نے کہا کہ 297 اچھا اسکور تھا لیکن اس کے بعد ہم گیند سے ابتدائی 10-15 اوورز میں منصوبہ بندی کے مطابق کھیل پیش نہ کر سکے۔ انہوں نے کہا کہ شکست کے باوجود مجھے اپنی ٹیم کی مجموعی کارکردگی پر فخر ہے، داسن اور شیہان نے بہت عمدہ بیٹنگ کی جبکہ پاکستان کے اس بولنگ کے خلاف گوناتھیلاکا کی سنچری بھی بہت بڑا کارنامہ ہے۔ تھریمنے نے کہا کہ یہ میرا پہلا دورہ پاکستان ہے اور یہاں آ کر کھیلنے کا تجربہ بہت اچھا اور یادگار رہا، میں دیگر ٹیموں کو بھی پاکستان آ کر کھیلنے کا مشورہ دوں گا۔ پاکستان کے کپتان سرفراز احمد نے سیریز میں کامیابی کے بعد گفتگو کرتے ہوئے کہا کہ اس ہدف کا تعاقب آسان نہیں تھا لیکن عابد علی نے شاندار بیٹنگ کی، انہوں نے جس طرح دباؤ کو برداشت کیا اس پر وہ مبارکباد کے مستحق ہیں۔ سرفراز نے کہا کہ ہماری فیلڈنگ اچھی نہیں تھی، ٹی20 سیریز میں فیلڈنگ بہتر کرنے کی کوشش کریں اور عمدہ کھیل پیش کریں گے۔ انہوں نے ٹیم کو انتباہ دیا کہ اگر ہم نے ٹی20 میچوں میں بھی اس طرح فیلڈنگ کی تو سیریز نہیں جیت سکیں گے۔ کپتان نے دونوں ٹیموں کی حمایت کرنے پر شائقین کا شکریہ ادکیا۔
