اسلام آباد : 3اگست ( ایجنسیز) پاکستان نے ایران کے پُرامن جوہری پروگرام کی حمایت کردی ۔ دونوں ممالک کے درمیان مختلف معاہدوں و مفاہمتی یادداشتوں کی دستاویزات کا تبادلہ بھی ہوا ہے ۔ اسلام میں ایران کے صدر کے ساتھ مشترکہ پریس کانفرنس میں وزیراعظم شہباز شریف نے کہا کہ پاکستان اصولی موقف پر ایران کے ساتھ کھڑا ہے ، ایران کے خلاف اسرائیل کی بلاجواز جارحیت پر پاکستان اور اس کے عوام نے مذمت کی ۔ شہباز شریف نے کہاکہ دوست وہ ہوتا ہے جو برے وقت میں ہاتھ تھامے ، دہشت گردی کے خلاف پاکستان اور ایران کی سوچ ایک ہے ۔ ایران سے دس ارب ڈالر کی تجارت کا ہدف جلد حاصل کرنے کی کوشش کریں گے ۔ وزیراعظم نے کہا کہ مسعود پزشکیان بطور ایرانی صدر پہلی مرتبہ پاکستان کے دورہ پر آئے ہیں ۔ باہمی روابط ، تعلقات ، بھائی چارہ ، مذہبی ، جغرافیائی اُمور سمیت دیگر معاملات پر سیر حاصل گفتگو ہوئی ۔انہوں نے کہا کہ جون میں اسرائیل نے بغیر کسی وجہ کے ایران کے خلاف جارحیت کی ، اسرائیلی جارحیت میں شہید ہونے والے ایرانی بھائیوں اور جرنلوں کو اللہ جنت میں جگہ دے ۔ شہباز شریف نے امید ظاہر کرتے ہوئے کہا کہ آج ایران کے ساتھ کئی ایم او یوز پر دستخط ہوئے ہیں ۔ خواہش ہے بہت جلد یہ معاہدوں کی شکل اختیار کریں ۔ ان کا کہنا ہے کہ ایران اور پاکستان ن ے10ارب ڈالرز کی تجاوت کا ہدف مقرر کیا ہے ، ایران کو پُرامن مقاصد کیلئے جوہری طاقت حاصل کرنے کا پورا حق ہے ۔اس موقع پر وزیراعظم نے غزہ میں فوری سیز فائر پر زور دیتے ہوئے کہا کہ ایران اور پاکستان نے فلسطینیوں کیلئے بھرپور آواز اٹھائی ۔ غزہ میں اب تک اسرائیلی بربریت جاری ہے ، دنیا کو غزہ میں امن کیلئے متحد ہونا ہوگا ۔
