میلبورن ۔ یہاں میلبورن ٹسٹ میچ کے تیسرے روز کھیل کے اختتام پر آسٹریلیا نے دوسری اننگز میں 6 وکٹ پر 187 رنز بنا کر پاکستان کے خلاف 241 رنز کی برتری حاصل کرلی۔ آج تیسرے دن پاکستان ٹیم پہلی اننگز میں 264 رنز پر آوٹ ہوئی تھی جس کے بعد آسٹریلیا نے دوسری اننگز 54 رنز کی برتری کے ساتھ شروع کی تو ابتدا سے ہی پاکستانی فاسٹ بولرز نے شاندار بولنگ کی۔ دوسری اننگز میں آسٹریلیا کی پہلی وکٹ پہلے اوورکی دوسری ہی گیند پر گرگئی، عثمان خواجہ کو صفر پر شاہین شاہ آفریدی نے کیچ آؤٹ کروایا۔ تیسرے اوور میں دوسری وکٹ بھی شاہین آفریدی نے ہی حاصل کی، اس مرتبہ انہوں نے مارنس لبوشین کو 4 رنز پر کیچ آؤٹ کروایا۔ ابتدائی دو وکٹیں حاصل کرنے کے بعد دوسرے سرے سے شاندار بولنگ کرتے ہوئے میر حمزہ نے بھی وکٹیں حاصل کرنا شروع کردیں۔ آسٹریلوی اننگز کے 5.1 اوور میں میر حمزہ نے ڈیوڈ وارنرکو 6 رنز پر بولڈ کیا جس کے بعد انہوں نے اگلی ہی گیند پر ٹریوس ہیڈ کو بھی بولڈ کیا۔ بہت جلد 4 وکٹیں گرنے کے بعد آسٹریلوی بیٹر اسٹیو اسمتھ اور مچل مارش نے پارٹنرشپ قائم کی، اس دوران مچل مارش نے 70 گیندوں پر 8 چوکوں کی مدد سے نصف سنچری اسکور کی۔ اسٹیو اسمتھ اور مچل مارش کی پارٹنرشپ کی بدولت آسٹریلیا نے میچ میں اپنا موقف مستحکم کیا جس کے بعد 49.5 اوورز میں میر حمزہ نے آسٹریلیا کی پانچویں وکٹ حاصل کرلی، انہوں نے مچل مارش کو 96 رنز پرکیچ آؤٹ کروایا۔ آسٹریلیا کی چھٹی وکٹ 62.3 اوورز میں 187 رنز پر گری جب اسٹیو اسمتھ کو 50 رنز پر شاہین آفریدی نے کیچ آؤٹ کروایا۔ اس سے قبل کھیل کے تیسرے روز آسٹریلیا کے خلاف پہلی اننگز میں پاکستان کی ٹیم 264 رنز بناکر آؤٹ ہوئی۔ پاکستان نے میچ کے تیسرے روز 6 وکٹوں کے نقصان پر 194 رنز سے اپنی اننگز شروع کی تو وکٹ کیپر بیٹر محمد رضوان 42 رنز بنا کر پیٹ کمنز کی بال پر آوٹ ہوئے۔ شاہین آفریدی 21، حسن علی اور میر حمزہ فی کس 2 رنز بناکر آؤٹ ہوئے جبکہ عامر جمال 33 رنز بنا سکے۔ آسٹریلوی کپتان پیٹ کمنز نے عمدہ کارکردگی کا مظاہرہ کرتے ہوئے 48 رنز دے کر 5 وکٹیں حاصل کیں، نیتھن لائن نے 4 اور جوش ہیزل ووڈ نے ایک کھلاڑی کو آؤٹ کیا۔
