کراچی۔16 مارچ (سیاست ڈاٹ کام) پاکستان اور بنگلہ دیش کرکٹ بورڈز نے دو ملکی سیریز میں شامل باقی میچز ملتوی کرنے کا فیصلہ کیا ہے۔ دونوں ٹیموں کے مابین سیریز میں شامل ونڈے میچ اور دوسرا ٹسٹ میچ ملتوی کردیے گئے ہیں۔ پیرکو پاکستان کرکٹ بورڈ کی جانب سے جاری کردہ بیان کے مطابق دونوں بورڈز اب مستقبل میں آئی سی سی ورلڈ ٹسٹ چمپئن شپ میں شامل سیریزکومکمل کرنے کے لیے باہمی مشاورت سے فیصلہ کریں گے۔ پاکستان اور بنگلہ دیش سیریز کا پہلا ٹسٹ میچ سات تا دس فروری تک راولپنڈی میں کھیلا گیا تھا، جس میں پاکستان نے ایک اننگز اور44 رنز سے کامیابی حاصل کی تھی۔ پاکستان کے خلاف سیریز کے دوسرے مرحلے میں شرکت کے لیے بنگلہ دیش کرکٹ ٹیم کو29 مارچ کوکراچی پہنچنا تھا۔ دونوں ٹیموں کے مابین واحد ونڈے یکم اپریل کو کھیلا جانا تھا جبکہ آئی سی سی ورلڈ ٹسٹ چمپئن شپ میں شامل دوسرا ٹسٹ میچ پانچ تا نو اپریل تک جاری رہنا تھا۔اس دوران پاکستان کرکٹ بورڈ نے 25 مارچ سے شروع ہونے والا پاکستان ونڈے کپ بھی غیرمعینہ مدت تک کے لیے ملتوی کردیا ہے۔
