راولپنڈی ۔ 6 فبروری ( سیاست ڈاٹ کام) راولپنڈی میں پاکستان اور بنگلہ دیش کے درمیان ٹسٹ سیریز کے لیے کپتان اظہر علی اور بنگلہ دیش کے کپتان مومن الحق کی موجودگی میں ٹرافی کی رونمائی ہوئی۔اس موقع پر پریس کانفرنس کرتے ہوئے قومی ٹیم کے کپتان اظہر علی کا کہنا تھا کہ ٹسٹ چیمپئن شپ کا ہر میچ اہم ہے، کوشش ہو گی بطور کپتان پرفارمنس دوں اور جیت میں اہم کردار ادا کروں۔ اظہر علی نے کہا کہ کوشش ہو گی کراچی ٹسٹ کے کامبینیشن کے ساتھ میدان میں اتریں کیونکہ راولپنڈی میں ٹسٹ میچ نتیجہ خیز ثابت ہوتے ہیں۔ انہوں نے کہا کہ ہم چاہ رہے ہیں کہ ہمارے پاس فاسٹ بولنگ آل راؤنڈر ہو، کوشش کر رہے ہیں کہ پاکستان میں ایسے کامبینیشن کے ساتھ کھیلیں جسے باہر بھی کھلایا جا سکے۔پاکستانی ٹیم کے کپتان نے کہا کہ ہم اپنے گھر میں ٹسٹ میچ جیتے ہیں،کوشش ہو گی کہ آنے والا ٹسٹ بھی جیتیں، ہماری کوشش ہے کہ ہمارے فاسٹ بولرز ہمیں ٹسٹ میچ جتوائیں۔ واضح رہے کہ پاکستان اور بنگلہ دیش کے درمیان دو میچوں پر مشتمل آئی سی سی ٹسٹ چیمپئن شپ کا پہلا میچ کل سے راولپنڈی کرکٹ اسٹیڈیم میں کھیلا جائے گا۔
