ممبئی: بالی ووڈ کے سینئر اداکار راج ببر کے بیٹے پراتیک نے اپنے نام سے والد کا نام ہٹا دیا۔ پراتیک نے اپنی آنجہانی والدہ اور بالی ووڈ اداکارہ کو خراج تحسین پیش کرتے ہوئے اپنا نام باضابطہ طور پر پراتیک سمیتا پاٹل رکھ کر مداحوں کو حیران کردیا ہے۔ پراتیک ببر نے اپنے نام سے کنیت ’ببر‘ ہٹا کر اپنی والدہ کا نام باقاعدہ سرکاری طور پر جوڑ کر اسے پراتیک سمیتا پاٹل رکھا ہے۔ ان کا کہنا ہے کہ انہیں کسی کے ردعمل کی کوئی پرواہ نہیں ہے۔ پراتیک نے اپنے انسٹاگرام ہینڈل کا نام بھی بدل کر پراتیک سمیتا پاٹل کر دیا ہے۔ پراتیک نے ذاتی اختلافات کی وجہ سے اپنی شادی میں والد کو شامل نہیں کیا۔ پراتیک اور ان کی اہلیہ پریا بنرجی نے اس معاملے پر خاموشی اختیار کر رکھی ہے۔ پراتیک نے اپنی زندگی کے اہم دن پر نہ صرف اپنے والد بلکہ اپنے بھائی یا بہن کو بھی مدعو نہیں کیا تھا۔
