میلبورن ۔29 جنوری (سیاست ڈاٹ کام) ٹینس کی دنیا میں مسٹرکْول کے نام سے مشہور راجر فیڈرر کا آسٹریلین اوپن کے کوارٹر فائنل کے دوران ضبط جواب دے گیا۔ غیر معروف کھلاڑی سینڈرین سے مسلسل دو سٹ ہارنے کے بعد غصے میں نازیبا الفاظ کہہ ڈالے، لائن ویمن نے نوٹس لیتے ہوئے میچ ریفری سے اس کی شکایت کی۔ آسٹریلین اوپن کے کوارٹر فائنل میں 20 مرتبہ کے گرانڈ سلام فاتح سوئس اسٹار راجر فیڈرر کا مقابلہ غیر معروف کھلاڑی سینڈرین سے تھا۔ پہلا سٹ تو فیڈرر 6-3 سے بآسانی جیت گئے، دوسرے سٹ میں سینڈرین نے کامیابی حاصل کی۔ تیسرے سٹ میں جب مقابلہ 2-0 ہواتو فیڈرر کا ضبط جواب دے گیا اور اْنہوں نے غصے کی حالت میں اپنے آپ کے لیے جرمن زبان میں نازیبا الفاظ استعمال کرڈالے جسے وہاں موجود لائن ویمن نے بھی سن لیا اور فیڈررکی شکایت میچ ریفری سے کردی۔ میچ ریفری نے ضابطہ اخلاق کی خلاف ورزی پر میچ روکا اور فیڈررکو تنبیہ کی۔ فیڈرر نے بجائے اپنی غلطی ماننے کے ریفری سے مزید بحث کی اور یہ ظاہر کیا کہ اْنہوں نے نازیبا الفاظ ادا نہیں کئے لیکن ریفری بضد رہیں کہ فیڈرر نے ایسا کہا ہے۔ کچھ وقت کے بعد میچ دوبارہ شروع ہوا تو فیڈررنے حریف کھلاڑی کو مات دے کر سیمی فائنل کے لیے کوالیفائی کرلیا۔ میچ کے بعد فیڈررنے پریس کانفرنس میں اعتراف کیا کہ اْنہوں نے نازیبا الفاظ اداکئے تھے۔